नंदूरबार l प्रतिनिधी
कोरोना सारख्या महाभयंकर आजाराचे सावट पसरले होते . कोरोना विषाणुचा प्रादुर्भाव वाढु नये यासाठी खबरदारीचा उपाय म्हणून महाराष्ट्र शासनाने देखील कारागृहातील कैद्यांना पॅरोल रजेवर सोडण्याचा निर्णय घेतलेला होता . कालांतराने कोरोनाचे संकंट हळुहळु दुर झाल्याने पॅरोल रजेवर सोडलेल्या कैद्यांना मुदतीत कारागृहात हजर होणे बंधनकारक होते .
परंतु शासनाने कैद्यांच्या बाबतीत दाखविलेली सहानुभुतीचा काही कैद्यांनी गैरफायदा घेत मुदतीत संबंधीत कारागृहात परत न जाता फरार झाले होते . म्हणून अशा फरार कैद्यांविरुध्द् कारागृह विभागाकडून कडक कारवाई करत नंदुरबार जिल्ह्यातील शहादा व सारंगखेडा येथे गुन्हे दाखल करण्यात आले होते . नंदुरबार जिल्ह्याचे पोलीस अधीक्षक पी . आर . पाटील यांनी मासिक गुन्हे बैठकीत कारागृहातून पॅरोल रजेवर आलेले परंतु कारागृहात परत न गेलेले फरार असलेल्या आरोपीतांचा आढावा घेतला असता ,
नंदुरबार जिल्ह्यातील विविध पोलीस ठाणे हद्दीत असे आरोपी असल्याचे निदर्शनास आल्याने नंदुरबार जिल्ह्याचे पोलीस अधीक्षक पी . आर . पाटील यांनी अशा फरार कैद्यांना तात्काळ ताब्यात घेऊन पुढील कारयदेशीर कारवाई करण्याचे निर्देश गुन्हे बैठकीत सर्व पोलीस ठाणे प्रभारी अधिकाऱ्यांना दिले . दि. 3 ऑगस्ट रोजी पोलीस अधीक्षक पी . आर . पाटील यांना गुप्त बातमीदारामार्फत बातमी मिळाली की ,
शहादा तालुक्यातील धांद्रे येथील शिवा चित्ते यास नाशिक कारागृह येथून कोविड रजेवर सोडले होते परंतु शिवा चित्ते हा कारागृहात परत न जाता धांद्रे येथील त्याच्या शेतात लपून बसलेला आहे त्याबाबत शहादा पोलीस ठाण्यात भा.द.वि. कलम 224 प्रमाणे गुन्हा दाखल करण्यात आलेला आहे .
पोलीस अधीक्षक पी . आर . पाटील यांनी सदरची बातमी स्थानिक गुन्हे शाखेला सांगून स्थानिक गुन्हे शाखेचे तात्काळ एक पथक तयार करुन बातमीची खात्री करून तात्काळ कारागृहातून बेकायदेशीररीत्या फरार असलेल्या कैद्यास ताब्यात घेवून कायदेशीर कारवाई करण्याचे आदेश दिले . स्थानिक गुन्हे शाखेच्या पथकाने शहादा तालुक्यातील धांद्रे गावातील शिवा चित्ते यांच्याबाबत सविस्तर माहिती प्राप्त करुन त्याच्या शेताचा ठावठिकाणा शोधून काढला व शिवा तारसिंग चित्ते रा . धांद्रे ता . शहादा यास शिताफीने ताब्यात घेवून त्यास पुढील कारवाईकामी शहादा पोलीस ठाण्याच्या ताब्यात देण्यात आले आहे .
त्याचप्रकारे सारंगखेडा पोलीस ठाणे हद्दीतील बामखेडा गावातील विजय विठ्ठल महाले यास देखील कारागृहातून कोविड रजेवर सोडण्यात आले होते परंतु विजय महाले हा कैदी देखील कारागृहात परत न गेल्याने त्याच्या सारंगखेडा पोलीस ठाण्यात भा.द.वि. 224 प्रमाणे गुन्हा दाखल करण्यात आला होता . सदर फरार कैदी बाबत स्थानिक गुन्हे शाखेला माहिती मिळाल्याने त्यास दि. 3 ऑगस्ट रोजी रात्री उशिरा शिताफीने ताब्यात घेऊन पुढील कारवाईकामी सारंगखेडा पोलीस ठाण्याच्या ताब्यात देण्यात आले आहे .
सदरची कामगिरी पोलीस अधीक्षक पी . आर . पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक रविंद्र कळमकर , स्थानिक गुन्हे शाखेचे सहा . पोलीस निरीक्षक संदीप पाटील , पोलीस हवालदार दिपक गोरे , पोलीस नाईक पुरुषोत्तम सोनार , विकास कापुरे पोलीस कॉन्सटेबल विजय ढिवरे , किरण मोरे यांच्या पथकाने केली आहे .