नंदुरबार l प्रतिनिधी
शहरालगत असलेल्या होळतर्फे हवेली शिवारात चोरट्यांनी घरफोडी करीत रोकडसह दागिने असा सुमारे ६२ हजार रुपये किंमतीचा ऐवज चोरुन नेला.
याप्रकरणी नंदुरबार शहर पोलिस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, नंदुरबार शहरालगत असलेल्या होळतर्फे हवेली शिवारात किरण संतोष शिंदे यांचे स्वप्निल विहार येथे घर आहे.
सदर घराच्या मागील दरवाजा तोडून चोरट्यांनी आत प्रवेश करुन ३० हजार रुपये किंमतीची रोकड, १५ हजार रुपये किंमतीचे ५ ग्रॅम सोन्याचे दागिने, दोन हजार रुपये किंमतीचे एलआयसी कॉईन, दोन हजार रुपये किंमतीच्या साड्या, पॅन्ट व कपडे, १२ हजार रुपये किंमतीचे दोन टीव्ही व ५०० रुपये किंमतीची सिलेंडरची टाकी असा एकूण ६१ हजार ५०० रुपये किंमतीचा ऐवज चोरुन नेला.
याबाबत किरण शिंदे यांच्या फिर्यादीवरुन नंदुरबार शहर पोलिस ठाण्यात अज्ञाताविरोधात भादंवि कलम ४५४, ४५७, ३८० प्रमाणे गुन्हा दाखल करण्यात आला आहे. पुढील तपास सहाय्यक पोलिस निरीक्षक प्रविण पाटील करीत आहेत.
