शहादा l प्रतिनिधी
येथील पूज्य साने गुरुजी विद्या प्रसारक मंडळाच्या के. व्ही. पटेल कृषी महाविद्यालयातील पुष्पकमल स्पर्धा परीक्षा मार्गदर्शन केंद्रातर्फे विद्यार्थ्यांसाठी स्पर्धा परीक्षा मार्गदर्शन व्याख्यानाचे नुकतेच आयोजन करण्यात आले होते.
प्रमुख मार्गदर्शक म्हणून आयएएस अकॅडमी अमरावतीचे प्रमुख संचालक प्रा. डॉ. नरेशचंद्र काठोळे हे उपस्थित होते. के.व्ही. पटेल कृषी महाविद्यालय येथील पुष्पकमल स्पर्धा परीक्षा केंद्रामार्फत विद्यार्थ्यांसाठी विविध उपक्रम राबविले जातात. महाविद्यालयाच्या सभागृहात “शेतकऱ्यांची मुले होणार आयएएस” या विषयावर प्रा. डॉ. नरेशचंद्र काठोळे यांचे व्याख्यान आयोजित करण्यात आले होते.
यावेळी बोलतांना डॉ. काठोळे म्हणाले, आयएएस अधिकारी होण्याचे स्वप्न साकार करण्यासाठी सर्वच विषयांच्या अभ्यास तपशीलवार व निरीक्षण पूर्वक करणे आवश्यक असते. अभ्यासक्रम व अभ्यासक्रमाबाहेरील प्रश्न समजून घेऊन त्यांची योग्य उत्तरे शोधावी लागतात. स्थानिक ते जागतिक पातळीवरील चालू घडामोडींबाबत अद्ययावत माहिती असणे आवश्यक आहे.
त्यासाठी वाचन नियमितपणे करावे. मिळालेल्या माहितीचे पृथक्करण करावे व नोंदी ठेवाव्यात. वर्तमानपत्र वाचनाचीही सवय असावी. व्यक्तिमत्व विकास करण्यासाठी आवश्यक असलेल्या बाबींचाही अभ्यासा असावा.त्यांनी व्यक्तिमत्व विकासासाठी कोणत्या गोष्टी आवश्यक आहेत याविषयी माहिती दिली.तसेच विद्यार्थ्यांनी आत्मविश्वास व धाडस अंगी बाळगावे. नेहमी आनंदी व प्रसन्न राहावे असे सांगितले.
अभ्यास कसा करावा, मुलाखत कशी द्यावी याविषयी प्रा. डॉ. काठोळे यांनी मार्गदर्शन केले. विद्यार्थ्यांनी विचारलेल्या विविध प्रश्नांची सविस्तर उत्तरे दिली. शंकांचे समाधान केले. या कार्यक्रमास जिल्हा परिषद प्राथमिक शिक्षक अमोल शिंदे, दिलीप पाटील, महाविद्यालयाचे प्राचार्य डॉ. प्रकाश पटेल, पुष्पकमल स्पर्धा परीक्षा केंद्राचे प्रमुख प्रा. राकेश कापगते, यांच्यासह महाविद्यालयीन प्राध्यापक व प्राध्यापकेतर कर्मचारी उपस्थित होते.
या कार्यक्रमासाठी मंडळाचे अध्यक्ष दीपक पाटील, उपाध्यक्ष जगदीश पाटील, सचिव श्रीमती कमलताई पाटील, समन्वयक प्रा. मकरंद पाटील यांचे मार्गदर्शन लाभले. कार्यक्रमाचे सूत्रसंचालन व आभार प्रा. पंकज पेंढारकर यांनी मानले. कार्यक्रमासाठी प्रा. प्रशांत चंदिले, प्रा, दिलीप सूर्यवंशी, प्रा. संदीप पाटील, प्रा.मुकेश कोळी आदींनी सहकार्य केले.
