नंदुरबार l प्रतिनिधी
शहरातील प्रभाग क्रमांक 18 मधील गवळीवाडा परिसरातील नंदेश्वर चौकात असलेल्या जुन्या मरीमाता मंदिराचा नव्याने जीर्णोद्धार करण्यात आला. नव्याने उभारण्यात आलेल्या मंदिराचा लोकार्पण सोहळा अमळनेरचे माजी आमदार शिरीष चौधरी यांच्या हस्ते शुक्रवारी झाला.
प्रतिवर्षी आषाढ महिन्यात कुटुंबासह गावावर येणारे अरिष्ट दूर व्हावे या भावनेतून मरीमाता मंदिरात पूजा अर्चना करण्यात येते. प्रभाग क्रमांक 18 चे भाजपा नगरसेवक गौरव प्रकाश चौधरी यांनी स्वखर्चाने गवळीवाड्यातील मरीमाता मंदिराची उभारणी केली.शुक्रवारी आषाढ महिन्यानिमित्त मंदिराचा जीर्णोद्धार आणि महाप्रसादाचे आयोजन करण्यात आले होते.
या लोकार्पण सोहळया प्रसंगी बोलताना माजी आमदार शिरीष चौधरी म्हणाले की, गोरगरीब जनतेची सेवा करणे हे लोकप्रतिनिधींचे कर्तव्य असते.केवळ भूलथापा आणि वल्गना न करता खऱ्या अर्थाने सर्वसामान्य गरिबांच्या समस्या जाणणारे लोकप्रतिनिधी लोकप्रिय ठरतात.
अमळनेर मतदार संघ असताना देखील सुमारे दोन कोटी रुपये नंदुरबार शहरातील विकास कामांसाठी मंजूर करण्याचे कसब केवळ जनतेच्या आशीर्वादामुळे झाल्याचे सांगितले.तसेच आगामी काळात गवळीवाड्यात भव्य समाज मंगल कार्यालय उभारण्यासाठी प्रयत्न करणार असल्याचे आश्वासन माजी आमदार शिरीष चौधरी यांनी दिले.
याप्रसंगी भाजपा गटनेते व नगरसेवक चारुदत्त कळवणकर व नगरसेवक गौरव चौधरी यांनी गेल्या चार वर्षात जनतेच्या सेवेचे व्रत घेतले असून भविष्यात देखील कायम राहणार असल्याचे प्रतिपादन केले.कार्यक्रमाचे सूत्रसंचालन गवळी समाज संस्थेचे नंदुरबार जिल्हा कार्याध्यक्ष महादू हिरणवाळे यांनी केले.लोकार्पण सोहळ्याप्रसंगी नगरसेविका सौ.संगीता वसईकर, नगरसेवक प्रशांत चौधरी, आनंद माळी, निलेश पाडवी, लक्ष्मण माळी, अर्जुन मराठे, रुग्णसेवक संतोष वसईकर, भाजपाचे ज्येष्ठ पदाधिकारी प्रकाश चौधरी, भीमसिंग राजपूत,
तसेच गवळी समाजाचे गंगाराम यादबोले, गौराजी देवर्षी लक्ष्मण गवळी, अण्णा घुगरे, काशिनाथ गोडळकर, आनंदा घुगरे ,अंबु गेनाप्पा ,खंडू हुच्चे, तुकाराम उंदीकर, काशिनाथ गेनाप्पा, संजय जोमिवाळे, हेमंत नागापुरे, लक्ष्मण गठरी, योगेश बारसे,बाला चौधरी यांच्यासह गवळीवाड्यातील गवळी समाज बांधव मोठ्या संख्येने उपस्थित होते. मरीमाता मंदिर लोकार्पण सोहळ्यानंतर शेकडो भाविकांनी महाप्रसादाचा लाभ घेतला.कार्यक्रम यशस्वीतेसाठी वीरशैव लिंगायत गवळी समाज पंचमंडळी आणि युवकांनी परिश्रम घेतले.
