नंदुरबार l प्रतिनिधी
राज्यात सद्यास्थितीत राजकीय नाट्य घडत आहे.यात नंदूरबार जिल्ह्यात शांतता असली तरी या नाट्याचा फटका अधिकाऱ्यांना बसला आहे. सातपुड्यातील विद्यार्थ्यांना शिक्षणाची सोयीसाठी धडगाव तालुक्यातील तोरणमाळ येथे इंटरनॅशनल स्कूल उभारण्यात आले आहे.
याची १६०० निवासी क्षमता आहे.या स्कूलचे उद्घाटन शालेय शिक्षणमंत्री वर्षा गायकवाड यांच्या उपस्थितीत दि.२४ जून रोजी करण्याचे आयोजन होते.दरम्यान राजकीय नाट्यामुळे अचानक काल दुपारी अधिकाऱ्यांना स्कूलचे उद्घाटन होणार असल्याचा निरोप आला व अवघ्या अर्ध्या तासात इंटरनॅशनल स्कूलचे ऑनलाईन उद्घाटन करण्यात आले.
सातपुड्यातील विद्यार्थ्यांना शिक्षणाची सोयीसाठी
धडगाव तालुक्यातील तोरणमाळ येथे इंटरनॅशनल स्कूल उभारण्यात आले आहे.
याची १६०० निवासी क्षमता आहे. २०१७ पासून इमारत तयार असून यासाठी कोट्यवधी रुपये खर्च करण्यात आले आहेत.मार्च महिन्यातच काम पूर्ण झाल्यानंतर सदर इमारत प्रशासनाने ताब्यात घेतली होती. त्यानुसार सद्यस्थितीत १ हजार ६८ विद्यार्थी येथे शिक्षण घेत आहेत.
या इमारतीचे उद्घाटन सुरुवातीला मुख्यमंत्री उद्धव ठाकरे यांच्या हस्ते होणार असल्याचे नियोजन होते. तशा सूचना यंत्रणेला देखील मिळाल्या होत्या. मात्र गेल्या आठवड्यातच मुख्यमंत्र्यांना येणे शक्य नसल्याने शालेय शिक्षणमंत्री वर्षा गायकवाड यांच्या हस्ते दि.२४ जून रोजी करण्यात येणार होते.
शिक्षणमंत्र्यांच्या दौऱ्याच्या पार्श्वभूमीवर प्रशासनातर्फे तयारी देखील करण्यात येत होती. मात्र राज्यात गेल्या दोन दिवसात राजकीय नाट्य घडत आहे याचा परिणाम म्हणून काल २२ जून रोजी दुपारी १२.३० वाजेच्या सुमारास अचानक अधिकाऱ्यांना इंटरनॅशनल स्कूलचे ऑनलाईन उद्घाटन सोहळा अर्ध्या तासात पार पडणार असल्याचा निरोप आला.
त्यामुळे अधिकारी गोंधळले अशातच पुढील अर्ध्या तासात इंटरनॅशनल स्कूलचे ऑनलाईन उद्घाटन मुख्य कार्यकारी अधिकाऱ्यांच्या दालनातच सदर ऑनलाईन उद्घाटन सोहळा पार पडला.
प्रास्ताविक मुख्य कार्यकारी अधिकारी रघुनाथ गावडे यांनी केले. या ऑनलाईन उद्घाटन सोहळ्याला शिक्षणमंत्री वर्षा गायकवाड, अदिवासी विकासमंत्री ॲड.के.सी.पाडवी, जिल्हाधिकारी मनिषा खत्री, मुख्य कार्यकारी अधिकारी रघुनाथ गावडे यांच्यासह जि.प.पदाधिकारी उपस्थित होते.