नंदुरबार | प्रतिनिधी
नंदुरबार जिल्हयातील धडगाव व तळोदा तालुक्यात आज दि.७ ऑगस्ट रोजी सायंकाळी पावणे पाचच्या सुमारास भुकंपाचे सौम्य धक्के जाणवले . अक्राणी तालुक्यातील धनाजी खुर्द , उम्राणी बु , सूर्यपूर , होडीपाडा तसेच तळोदा तालुक्यातील बोरद , खरवड , प्रतापपूर भागात भुकंपाचे धक्के जाणवले . ३.२ रिश्टर स्केलची नोंद करण्यात आली आहे . भुकंपाचा केंद्रबिंदू सरदार सरोवर पासून ५६ किलोमीटरवर असल्याची नोंद करण्यात आली आहे .
नंदुरबार जिल्हयात सरदार सरोवरमुळे अधुनमधून भुकंपाचे धक्के जाणवत असतात.आज सायंकाळी ४.४५ च्या सुमारासदेखील जिल्हयातील अनेक गावांमध्ये भुकंपाचे सौम्य धक्के जाणवले . अक्राणी तालुक्यातील धनाजी खुर्द येथे ३.२ रिश्टर स्केल भुकंपाची नोंद करण्यात आली आहे . तसेच अक्राणी तालुक्यातीलच उम्राणी बु , उम्राणी खूर्द , सूर्यपूर , होडीपाडा , आमला , आचपा , राडीकमल , तळोदा तालुक्यातील बोरद , खरवड , प्रतापपूर , तहावद भागातही दोन सेकंद भुकंपाचे धक्के जाणवले . यामुळे परिसरातील नागरिकांमध्ये खळबळ उडाली होती . अनेकांनी एकमेकांना दुरध्वनी , मोबाईलद्वारे संपर्क करुन भुकंपाची माहिती दिली . या भुकंपाचे केंद्र हे सरदार सरोसर प्रकल्पापासून ५६ किलोमीटर असल्याची नोंद गांधीनगर येथील इन्स्टीटयुट ऑफ सेस्मॉलॉजीकल रिसर्चने केली आहे . या भुकंपामुळे कुठलीही जिवीत अथवा वित्त हानी झालेली नाही . त्यामुळे नागरिकांनी घाबरु नये तसेच कुठल्याही अफवांना बळी न पडू नये असे आवाहन प्रशासनातर्फे करण्यात आले आहे .
