नंदुरबार l प्रतिनिधी
ऑलिंपिकच्या धर्तीवर बनवण्यात आलेल्या पालिकेच्या स्व.बाळासाहेब ठाकरे जलतरण तलावाचे महाराष्ट्र दिनाचे औचित्य साधून शिवसेनेचे नेते तथा माजी आ.चंद्रकांत रघुवंशी यांच्या हस्ते शुभारंभ करण्यात आले .
नंदुरबार जिल्ह्यातील युवकांना जलतरणची सोय व्हावी. जलतरण स्पर्धेत जिल्ह्यातील युवक राष्ट्रीय पातळीवर चमकावेत यासाठी माजी आ.चंद्रकांत रघुवंशी, नगराध्यक्षा सौ. रत्ना रघुवंशी यांच्या पुढाकारातून नगरपरिषदेच्या माध्यमातून धुळे रस्त्यावर स्व.बाळासाहेब ठाकरे जलतरण तलाव साकारण्यात आलेले आहे. या तलावाचे उद्घाटन मागील वर्षी मुख्यमंत्री उद्धव ठाकरे यांनी ऑनलाइनद्वारे केले होते. दोन वर्षांपूर्वीच जलतरण तलाव बांधून तयार करण्यात आले होते. परंतु, कोरोनामुळे शासनाचे निर्बंध आल्यावर तलाव सुरू होऊ शकला नाही.
सध्या कोरोनाचा परिस्थिती नियंत्रणात असल्याने तसेच शासन निर्बंध शिथिल करण्यात आल्यामुळे १ मे रोजी महाराष्ट्र दिनाचे औचित्य साधून शिवसेनेचे नेते तथा माजी आ. चंद्रकांत रघुवंशी यांच्या हस्ते शुभारंभ करण्यात आला.
कार्यक्रमाच्या अध्यक्षस्थानी नगराध्यक्ष सौ.रत्ना रघुवंशी होत्या. यावेळी उपनगराध्यक्ष कुणाल वसावे, मुख्याधिकारी अमोल बागुल, पाणीपुरवठा सभापती कैलास पाटील, नगरसेवक दीपक दिघे,गजेंद्र शिंपी, जगन माळी,माजी नगरसेवक दीपक कटारिया, नगर अभियंता विजय पाटील, अशोक वसंत चौधरी, वर्ड ऑफ स्पोर्ट शिक्षण सांस्कृतिक संस्थेचे संस्थेचे अध्यक्ष राजेंद्र निंबाळते उपस्थित होते. जिल्ह्यातील नागरिकांनी जलतरण तलावाच्या लाभ घेण्याचे आवाहन माजी आमदार चंद्रकांत रघुवंशी यांनी केले आहे.
