नंदुरबार l प्रतिनिधी
पुणे येथे होत असलेल्या राज्यस्तरीय मैदानी अजिंक्यपद स्पर्धेसाठी दि.१२ एप्रिल मंगळवार रोजी नंदुरबार जिल्हा संघ निवड चाचणीचे आयोजन करण्यात आले आहे. या निवड चाचणी स्पर्धेत जास्तीत जास्त स्पर्धकांनी सहभागी व्हावे, असे आवाहन नंदुरबार जिल्हा ऍथलेटिक्स संघटनेचे अध्यक्ष माजी आमदार चंद्रकांत रघुवंशी, सचिव प्रा.दिलीप जानराव यांनी केले आहे.
महाराष्ट्र ऍथलेटिक्स संघटनेच्यावतीने दि.२१ ते २३ एप्रिल २०२२ दरम्यान पुणे येथे वरिष्ठ गटाच्या महिला व पुरुष तसेच २० वर्षाखालील मुले व मुलींसाठी राज्यस्तरीय अजिंक्यपद स्पर्धेचे आयोजन करण्यात आले आहे. या स्पर्धेमध्ये नंदुरबार जिल्ह्याचा संघ सहभागी होणार आहे. संघ निवडण्यासाठी जिल्हा ऍथलेटिक्स असोसिएशनच्यावतीने जिल्हा क्रीडा संकुल नंदुरबार येथे १२ एप्रिल २०२२ मंगळवार रोजी सकाळी ६:३० वाजता जिल्हा निवड चाचणी स्पर्धेचे आयोजन करण्यात आले असून या स्पर्धेत धावणे, चालणे, लांब उडी, उंच उडी, गोळाफेक, भालाफेक, हातोडा फेक आदी क्रीडा प्रकारांचा समावेश असणार आहे. स्पर्धेतून प्रत्येक क्रीडा प्रकारातील दोन विजयी महिला व पुरुष खेळाडूंची निवड राज्य संघटनेने दिलेल्या पात्रतेच्या निकषानुसार जिल्ह्याच्या संघात केली जाणार आहे. स्पर्धेला येताना २० वर्षाखालील खेळाडूंनी जन्मतारखेचा दाखला सोबत आणणे आवश्यक आहे. अधिक माहितीसाठी स्पर्धा संयोजक डॉ.मयुर ठाकरे, जगदीश वंजारी यांच्याशी संपर्क साधावा.
