तळोदा l प्रतिनिधी
तळोदा तालुक्यातील बहुरूपा शिवारात १० दिवसाचे बिबट्याचे बछडे आढळले.दरम्यान वनविभागाकडे पुरेश्या सोय सुविधा नसल्यामुळे वनविभागाने त्यास ट्रॅप कॅमेरे लावून त्याच शेतात ठेवण्याचा निर्णय घेतला आहे.
तळोदा तालुक्यात शेतशिवारात बिबट्याची दहशत कायम असून यामुळे शेतकरी व शेतमजूर तसेच ग्रामस्थांमध्ये प्रचंड घबराटीचे वातावरण पसरले आहे. मागील काही दिवसांपासून चिनोदा, रांझणी, रोझवा या भागात बिबट्याचा मुक्त संचार मोठ्या प्रमाणावर दिसून येत होता. चिनोदा, रांझणी, रोझवा शिवारात बिबट्याने वराह, श्वान, गायीचे वासरू, शेळ्या फस्त केल्याच्या घटना देखील घडल्या आहेत. बहुरुपा येथील शेत शिवारात गिरधर पटेल यांच्या शेतात भर दिवसा दुपारी ३ वाजेच्या सुमारास बिबट्याचे १० दिवसाचे बछडे मुक्त संचार करताना शेतमालक याना दिसून आले. त्यांनी याबाबतची माहिती लागलीच वनविभागाला कळविली. त्यानंतर वनविभागाचे कर्मचाऱ्यांनी घटणास्थळी भेट दिली. यावेळी मानव वनजिव रक्षकचे सागर निकुंभ, दिनेश कोळी, हेमंत चौधरी, गुजरात व महाराष्ट्रा वनविभागाचे कर्मचाऱ्यानी परिस्थीती जाणून घेतली. दरम्यान यापूर्वी देखील अश्याच पद्धतीने तालुक्यात ठिकठिकाणी बछडे आढलून आले होते. दरम्यान वनविभागाकडे त्यांच्या निगा राखण्यासाठी पुरेसा सुविधा नसल्याने त्या बछड्यांना बोरेवली नॅशनल पार्क येथे रवाना करण्यात आले होते. मागील परिस्थितीचा अनुभव घेता व रात्रीची सुमारास मादी बिबट येवून त्या बछड्यास घेवून जाईल या आशेवर वनविभागाने त्या ठिकाणी 2 ट्रॅप कॅमेरे लावले असून आढळलेले बछड्यास ताब्यात न घेता त्याच शेतात ठेवण्याचा निर्णय घेतला आहे.
