नंदुरबार ! प्रतिनिधी
सातपुडा पर्वत रांगेतील अक्कलकुवा तालूक्यातील ‘बालाघाट’ या अतिशय दुर्गम लहान खेड्यातील आदिवासी समाजातील पहिला नवयुवक अनिल वसावे यांने कोरोना काळानंतर युरोपातील सर्वोच्च शिखर ‘माऊंट एलब्रूस’ सर करून विश्वविक्रम केला आहे. कोरोना काळात जगात सुरू झालेल्या पर्वत आरोहण मोहिमेतील अनिल वसावे हा भारतातून गेलेल्या गिर्यारोहकांमधून पहिला आदिवासी समाजाचा प्रतिनिधी ठरला आहे.
अनिल वसावे यांच्याशी बोलताना त्यांनी सांगितले की, हे ध्येय त्याने अत्यंत कठीण परिस्थितीत गाठले असून आजवर त्याने 2021 मध्ये केलेली ही दुसरी आंतरराष्ट्रीय मोहीम आहे. 26 जानेवारी 2021 रोजी ही अनिल वसावे याने आफ्रिका खंडातील माऊंट किलीमांजारो हे शिखर सर केले होते. आता 8 जुलै,2021 मध्ये एकाच वर्षी 2 आंतरराष्ट्रीय मोहिमा अंमलात आणताना युरोपातील सर्वोच्च शिखर सर करणाऱ्या टीम चे नेतृत्व ही करायला मिळणे ही खरी तर प्रचंड अभिमानाची गोष्ट होती. ही कामगिरी करताना अनिल वसावे याला एव्हरेस्टवीर आनंद बनसोडे यांचे अत्यंत मोलाचे मार्गदर्शन लाभले असून येणाऱ्या काळात 7 ही खंडातील 7 सर्वोच्च शिखरे सर करण्याचा त्यांचा मानस आहे, असे त्यांनी पब्लिक मिरर शी बोलताना सांगितले.
