नंदूरबार l प्रतिनिधी
धडगाव येथील बसस्थानक आवारातील प्रवासी शेडच्या लोखंडी अँगलला कापडी पट्टा व नॉयलॉनची पांढरी पट्टी बांधून २३ वर्षीय अनोळखी युवकाने एकतर्फी प्रेम प्रकरणातून गळफास घेतल्याची घटना घडली. सदर घटनेने खळबळ उडाली आहे. पोलिसांकडून युवकाची ओळख पटविण्याचे आवाहन करण्यात आले आहे.
धडगाव येथील बसस्थानकातील शेडमध्ये काल दि.26 मार्च रोजी सकाळी पावणेसहा वाजेच्या सुमारास काही प्रवासी आल्यानंतर त्यांना प्रवाशांसाठीच्या शेडमध्ये लोखंडी ॲँगलला एका युवकाने गळफास घेतल्याचे निदर्शनास आले. यामुळे ते बसस्थानक आवाराबाहेर येवून त्यांनी परिसरात असणाऱ्या नागरिकांना याबाबत माहिती दिली. यावेळी हॉटेल व्यावसायिक गोपाल सुधाकर मोरे यांनी पोलिसांना घडलेल्या घटनेबाबत माहिती दिली. बसस्थानकातील प्रवासी शेडमध्ये युवकाने गळफास घेतल्याची माहिती मिळाल्यानंतर पोलिस निरीक्षक गौकुळ औताडे यांच्यासह पोलिस अधिकारी, कर्मचारी घटनास्थळी दाखल झाले. यावेळी सुमारे २३ वर्षीय युवकाने गळफास घेतल्याचे निदर्शनास आले. घटनास्थळी असलेल्या दगडी फरशीवर खडूने एका मुलीच्या नावाने उद्देशून त्याने प्रेमासंबंधी मजकूर लिहिला आहे व एकतर्फी प्रेम प्रकरणातून गळफास घेतल्याचा अंदाज व्यक्त करण्यात येत आहे. सदर अनोळखी युवकाची ओळख पटविण्याचे आवाहन पोलिसांतर्फे करण्यात आले आहे. दरम्यान, बसस्थानकाच्या प्रवासी शेडमध्येच गळफास घेतल्याने धडगाव परिसरात सकाळी एकच खळबळ उडाली होती. याबाबत गोपाल मोरे यांच्या खबरीवरुन धडगाव पोलिस ठाण्यात अकस्मात मृत्यूची नोंद करण्यात आली आहे. पुढील तपास पोहेकॉ.राजेंद्र जाधव करीत आहेत.दरम्यान फरशीवरील मजकूरात मयत युवकाने आत्महत्येचे कारण नमूद केले असून मुलीच्या नावाचाही उल्लेख केला आहे. यासोबतच ‘अर्जून’ असे नाव लिहिले आहे. तर त्याच्या डाव्या हाताच्या पंजावर ‘ए’ असे गोंधलेले आहे. हातात स्टिलचा कडा व एका हातात मनगटावर मण्यांची माळ गुंडाळलेली दिसून आली आहे. सदर अनोळखी युवकाची ओळख पटविण्याचे आवाहन पोलिसांतर्फे करण्यात आले आहे.