नवापूर | प्रतिनिधी
येथील नगरपालिकेची महावितरणकडे २३ लाखांची थकबाकी आहे तर महावितरणची नगरपालिकेकडे ३३ लाखांची थकबाकी आहे. या दोन्ही यंत्रणांनी आपापल्या अधिकाराचा वापर करुन महावितरणने पालिकेचे वीज कनेक्शन खंडीत केले आहे तर नगरपालिकेने महावितरणचे कार्यालय सिल केले आहे. या कारवाईमुळे शहरात एकच चर्चा सुरु आहे.
मार्च महिना अखेर असल्याने सर्वच शासकीय कार्यालयांनी वसुलीसाठी कंबर कसली आहे. थकबाकीसाठी नेहमी ग्राहकांकडे तगादा लावणार्या कार्यालयाची थकबाकी बघून डोळे पांढरे होतील अशी स्थिती आहे.
महावितरण कंपनीचे पालिकेकडे पथदिवे आणि पाणी पुरवठा कार्यालयाचे ३३ लाख रुपयांचे बिल थकले आहे. थकबाकी असल्याने महावितरण कंपनीने नगर परिषदेचे कार्यालय व पथदिव्यांचे वीज कनेक्शन कट केले आहे.त्याचा राग आल्याने आज नगर परिषदेने ही वीज वितरण कंपनीच्या कार्यालयाकडे नगर परिषदेची १९९२ पासून २३ लाखांची थकबाकी असल्याने महाविज वितरण कंपनीचे कार्यालय सील केले.
यावेळी नवापूर नगरपालिकेचे प्रशासकीय अधिकारी अनिल सोनार, सतिष बागुल, पाणी पुरवठा अधिकारी सचिन अग्रवाल, अभियंता संदानशिव, रमेश सोनार, आरोग्य कर्मचारी उपस्थित होते.तसेच विज अभियंता हेमंत बनसोड व वीज कर्मचारी उपस्थित होते.
नगरपालिकेने केलेली कारवाई चुकीची
सार्वजनिक पाणीपुरवठा व स्ट्रीट लाईट यांची नगरपालिकेची थकबाकी ३२ लाखावर आहे. याबाबत नगर पालिकेला संपर्क केला असता जे काही पोल, डिपी शिवारात उभे आहेत. त्यांचे पण चार्जेस लावलेले होते. त्यांना आम्ही सन ९२ व २०१८ चे दोन्ही जीआर दिले आहेत. त्यांनी थकबाकी दिली नाही. त्यामुळे आम्ही दोन्ही ठिकाणी जाऊन वीजपुरवठा खंडीत केला आहे. नगरपालिकेनेही आमचे वीज वितरण कार्यालयाचे ऑफिस सील केले आहे. परंतु आम्ही पोल डिपी यांचा खर्च वगळता सर्व थकबाकी भरणा केलेली आहे. तरी नगर पालिकेने केलेली कारवाई चुकीची आहे. नगर पालिकेने आमची थकबाकी त्वरीत भरावी.
– हेमंत बनसोड, अभियंता, वीज वितरण कंपनी नवापूर
थकबाकीदारांनी आपली थकबाकी त्वरित भरावी
नवापूर वीज वितरण कंपनीकडे नगरपालिकेची थकबाकी २३ लाख असल्याने पाठपुरावा करुनदेखील त्यांनी भरणा न केल्याने वीज वितरण कंपनीचे कार्यालय आहे त्या स्थितीत सील करण्यात आले आहे. शहरातील नागरीकांकडे नगर पालिकेची थकबाकी असेल त्यांनी त्वरित थकबाकी भरुन नगर पालिकेस सहकार्य करावे. यापुढेही अशीच कारवाई सुरू राहील.
– अनिल सोनार, प्रशासकीय अधिकारी नवापूर नगर पालिका