नंदुरबार l प्रतिनिधी
येथील ईस्माईल दगु जनसेवा फाऊंडेशनच्या वतीने शहरातील धुळे चौफुलीवरील हजरत अबुल गाझी दर्ग्याजवळ विनामुल्य पाणपोई सुरु करण्यात आली आहे. उन्हाच्या तीव्र झळा पाहता तहानलेल्यांची तहान भागविण्यासाठी पाणपोई सुरु करुन सेवा केली जात असल्याने नागरीकांकडून समाधान व्यक्त होत आहे.
नंदुरबार शहरातील ईस्माईल दगु जनसेवा फाऊंडेशनतर्फे वर्षभर विविध सामाजिक उपक्रम राबविण्यात येतात. त्याचाच एक भाग म्हणुन पाणपोई सेवा सुरु करण्यात आली आहे. शहरातील हिंदु-मुस्लिम बांधवांचे श्रध्दास्थान असलेल्या हजरत अबुल गाझी दर्ग्यावर नेहमी भाविक येतात. तसेच धुळे चौफुली हा परिसर वर्दळीचा असल्याने नेहमी प्रवासी व नागरीकांची ये-जा सुरु असते. सध्या उन्हाळा ऋतुला सुरुवात झाल्याने दिवसभर उन्हाच्या तीव्र झळांमुळे जिवाची लाहीलाही होत असते. अशावेळी अनेकांना तहान भागविण्यासाठी पिण्याच्या पाण्याची गरज भासत असते. हीच बाब ओळखुन दरवर्षाप्रमाणे यंदाही शहरातील धुळे चौफुलीवरील हजरत अबुल गाझी दर्ग्याजवळ ईस्माईल दगु जनसेवा फाऊंडेशनतर्फे पाणपोईचे उद्घाटन फाऊंडेशनचे संस्थापक अध्यक्ष एजाज बागवान यांच्या हस्ते करण्यात आले. याप्रसंगी संस्थेचे सहसचिव हाजी असलम चौधरी, हाजी फारुख खाटीक, काँग्रेस सेवा दलाचे जिल्हा सरचिटणीस नासिर इब्राहीम बागवान, सदा जनसेवा फाऊंडेशनचे उपाध्यक्ष शाकीर जाबीर बागवान, शौकत धोबी, पोकॉ.योगेश जाधव, पोकॉ.महेंद्र ठाकूर, अल्ताफ बागवान, फैय्याजोद्दीन काझी, पटेल मुझावर, सैय्यद जफर, आरिफ पठाण, रशिद मिर्झा, रफिक मिर्झा, सुलेमान मन्सुरी, बशिर शहा आदी उपस्थित होते. आरोग्यासाठी मटक्याचे पाणी अमृत असल्याचा संदेश पाणपोईतून देण्यात आला आहे.
