म्हसावद l प्रतिनिधी
मानव विकास कार्यक्रमातर्गत अतिमागास तालुक्यातील लांब दूरवर शाळांमध्ये पायी जात शिक्षण घेणाऱ्या विद्यार्थीनीना सायकल खरेदीसाठी राज्य शासनामार्फत प्रती सायकल ३५०० रु. अनुदान दिले जात होते.मात्र वाढत्या महागाईमुळे व सायकलीच्या किमती मोठ्या प्रमाणात वाढल्यामुळे अनुदानात वाढ करण्याची मागणी करण्यात येत होती.राज्य शासनाने मूळ अनुदानात वाढ करून प्रति विद्यार्थीनी ५००० रु.अनुदान सायकल खरेदीसाठी देण्यात येणार आहे.यामुळे विद्यार्थीनिमध्ये समाधानाची भावना दिसून येत आहे.
राज्य शासनाच्या नियोजन विभागामार्फत नुकताच शासननिर्णय प्रसिद्ध करण्यात आला असून राज्यातील अतिमागास असलेल्या १२५ तालुक्यामध्ये ही योजना राबविण्यात येणार आहे.इयत्ता ८ वि ते १२ वि पर्यत शिक्षण घेणाऱ्या व घरापासून पाच किमीपेक्षा कमी अंतरावर शाळा असणाऱ्या विद्यार्थीनीच्या बँक खात्यावर सायकल खरेदीसाठी डीबीटी अंतर्गत दोन टप्प्यात अनुदान दिले जाणार आहे.यामुळे विद्यार्थीनी व पालकांमध्ये समाधान दिसून येत आहे.
पाठपुराव्याला यश- प्रवीण महाजन
वाढत्या महागाईमुळे सायकलीच्या किमतीसुद्धा वाढल्या आहेत.शासनाकडून सायकल खरेदीसाठी मिळणाऱ्या ३५०० रु.अनुदानात विद्यार्थीनीना सायकल खरेदी करणे अशक्य होतं होते.या अनुदानात वाढ करण्यात यावी यासाठी आम्ही अनेक दिवस शासनाकडे पाठपुरावा करत होतो.या पाठपुराव्याला यश आले असून आता इयत्ता ५ वि पासून पुढे शिक्षण घेणाऱ्या विद्यार्थीनीना ही योजना लागू करावी यासाठी लढा असणार आहे.