तळोदा l प्रतिनिधी
अलिविहिर येथील शासकीय आश्रम शाळेत आदिवासी प्रकल्प मार्फत विविध दाखल्यांसाठी शिबिर आयोजित करण्यात आले होते.यावेळी ६४५ विद्यार्थ्यांना जातीचे दाखले वाटप करण्यात आले.दरम्यान तळोदा आदिवासी विकास प्रकल्पांने आदिवासी विद्यार्थ्यांसाठी हा उपक्रम राबवून राज्यात अव्वल ठरला आहे. तसेच प्रकल्पाच्या या स्तुत्य उपक्रमामुळे विद्यार्थ्यांची गैरसोय दूर झाल्याने पालकांनी समाधान व्यक्त केले आहे.
पुढील शैक्षणिक वर्षासाठी जातीचे व तत्सम दाखले आदिवासी विद्यार्थ्यांना लागत असतात.तथापि हे दाखले काढण्यासाठी विद्यार्थी व त्यांचा पालकांना कागद पत्रांची पूर्तता करताना मोठी दमछाक होते.यात त्यांचा वेळ व पैसा देखील खर्च होत असतो.तरीही काही वेळेस यंत्रणांच्या उदासीन धोरणामुळे वेळेवर मिळत नाही.ही पार्श्वभूमी लक्षात घेवून येथील आदिवासी विकास प्रकल्पाने आपल्या न्युक्लिअस बजेट मधून आपल्या अखत्यारीत असलेल्या शासकीय आश्रम शाळामधील विद्यार्थ्यांना जातीचे दाखले व आधार अपडेट्स करून देण्यासाठी भरीव निधीची तरतूद केली आहे.त्यामुळे तळोदा तालुक्यातील आलिविहिर येथे शिबीर आयोजीत केले होते.या शिबिरात साधारण ६४५ विद्यार्थ्यांना जातीचे दाखले वाटप करण्यात आले. हे दाखले प्रकल्प अधिकारी डॉ मैनाक घोष यांच्या उपस्थित देण्यात आले.या वेळी प्रकल्प अधिकारी डॉ घोष यांनी विद्यार्थ्यांना मार्गदर्शन करताना सांगितले शासनाने आदिवासी विकास प्रकल्प मार्फत आदिवासी विद्यार्थ्यांना जातीचे दाखले उपलब्ध करून देण्यासाठी भरीव निधी मंजूर केला आहे.त्यामुळे सर्व विद्यार्थ्यांना जातीचे दाखले उपलब्ध करून देण्यात येतील.त्यासाठी आता फिरफिर करावी लागणार नाही.शिवाय हे दाखले त्यांना पुढील शैक्षणिक कामासाठी देखील कामात येतील.कार्यक्रमाचे प्रास्ताविक,सूत्रसंचालन सहायक प्रकल्प अधिकारी सुवर्णा सोलंकी यांनी केले होते. शिबिरास सहायक प्रकल्प अधिकारी नंदकुमार साबळे,अधीक्षक, मुख्याध्यापक,शिक्षक उपस्थित होते.शिबिर यशस्वीतेसाठी प्रांत कार्यालयातील नेट वर्क अभियंता वाल्मीक पाटील व संगणक संचालक यांनी परिश्रम घेतले होते.
