नंदुरबार l प्रतिनिधी
संपूर्ण जगाचे लक्ष वेधून असलेल्या अयोध्येतील श्रीरामाच्या प्राणप्रतिष्ठा सोहळ्याच्या पूर्वसंध्येला महा संसद रत्न खा. डॉ. हिना गावीत यांच्या नेतृत्वात काढण्यात आलेल्या ‘सकल हिंदू समाज’ आयोजित राम जानकी यात्रेत आणि बाईक रॅलीत हिंदुत्वासाठी कार्यरत असलेल्या वेगवेगळ्या संघटनांचे पदाधिकारी तसेच पक्षांचे पदाधिकारी यांच्यासह नंदुरबार शहरातील शेकडो युवक युवतींनी सहभाग घेत प्रचंड प्रतिसाद दिला. खा.डॉ.हिना गावित यांच्या नेतृत्वात महिलांनी आणि युवतींनी घेतलेला विशेष सहभाग या रॅलीतील आकर्षण बिंदू ठरला.
अयोध्येतील श्रीरामाच्या मूर्तीच्या प्राणप्रतिष्ठा सोहळ्याच्या पार्श्वभूमीवर अवघी नंदनगरी भगव्या ध्वजांनी नटलेली दिसली. सदर बाईक रॅली चे आयोजन सकल हिंदू समाज अवध राम मंदिर निर्माण समिती, नंदुरबार द्वारे करण्यात आले. राम सीता लक्ष्मण यांचा जिवंत देखावा युवकांचा उत्साह द्विगुणित करताना दिसला. खा.डॉ.हिना गावित यांनी राम जानकी रथाला भावपूर्ण नमन करून सर्व उपस्थितांना अयोध्येतील सोहळ्यानिमित्त शुभेच्छा दिल्या. दरम्यान, शहरातील प्रत्येक रस्त्यावर जागोजागी तसेच बाईक रॅलीच्या मार्गावर देखील जागोजागी लावलेले भगवे ध्वज लक्ष वेधून घेत होते. नंदुरबार शहरातील मोदी ग्राउंड वरून खा.डॉ.हिना गावित यांच्या प्रमुख उपस्थितीत या रॅलीचा प्रारंभ करण्यात आला. सुरू झालेल्या बाईक रॅली दरम्यान प्रत्येकाच्या हातात आणि प्रत्येकाच्या दुचाकी वर भगवे ध्वज फडकत होते.
‘जय श्रीराम’ च्या घोषणांनी जणू शहर दुमदुमून गेले. शहरातील उड्डाणपूल मार्गे गांधी पुतळा, दीनदयाळ चौक , D.R. हायस्कुल येथून सुरवात होवून , जुनी नगर पालिका, नेहरू पुतळा, गांधी पुतळा, उड्डाणपूल, गिरीविहार, कोरिटनाका, करणं चौफुली, मोदी ग्राउंड, सिंधी कॉलनी, उड्डाणपूल, महाराष्ट्र व्यायाम शाळा , सोनार खुंट, जळका बाजार , मोठा मारुती येथे सांगता व सामूहिक रामरक्षा पठण करून विसर्जित करण्यात आली.