नंदुरबार l प्रतिनिधी
पथराई ता. नंदुरबार येथील के. डी. गावित सैनिकी विद्यालय व कनिष्ठ महाविद्यालय, येथे भारताचा ८० वा स्वातंत्र्य दिन उत्साहपूर्ण वातावरणात साजरा करण्यात आला.
आदिवासी देवमोगरा एज्युकेशन सोसायटीच्या संचालिका ईलाताई गावित यांच्या हस्ते ध्वजारोहण करण्यात आले.
यावेळी आदिवासी देवमोगरा एज्युकेशन सोसायटीचे अध्यक्ष राजेंद्रकुमार गावित, सचिव डॉ. विभूती गावित, सचिव ऋषिका गावित यांच्यासह के. डी. गावित शैक्षणिक संकुलातील सर्व प्राचार्य, प्राध्यापक, शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते.
स्वातंत्र्य दिनानिमित्त सैनिकी विद्यालयातील विद्यार्थ्यांनी शिस्तबद्ध व दिमाखदार पथसंचलन करून उपस्थित मान्यवरांना मानवंदना दिली. विद्यार्थ्यांच्या पथसंचलनाने कार्यक्रमस्थळी देशभक्ती व राष्ट्राभिमानाचे वातावरण निर्माण झाले.
यावेळी चिराग पावरा, अमित वसावे, ध्रुव जाधव आणि रोहित राऊत या विद्यार्थ्यांनी स्वातंत्र्य दिनानिमित्त मनोगत व्यक्त केले. त्यानंतर के. डी. गावित इंग्लिश मीडियम स्कूलच्या विध्यार्थ्यानी देशभक्तीपर गीतांवर आकर्षक नृत्य सादर करून उपस्थितांची दाद मिळवली.
कार्यक्रमात ऋषिका गावित, डॉ. विभूती गावित व ईलाताई गावित यांनी मनोगतातून विद्यार्थ्यांना मार्गदर्शन केले.
अध्यक्ष राजेंद्रकुमार गावित यांनी आपल्या मार्गदर्शनातून विद्यालयीन जीवनातील स्वातंत्र्यदिनाच्या आठवणींना उजाळा दिला. तसेच, “माणसाला कामाचे, परिश्रमाचे वेड लागले पाहिजे. कामावर निष्ठा, श्रद्धा आणि विश्वास ठेवून प्रामाणिकपणे कार्य केल्यास विकसित भारताचे स्वप्न लवकरच पूर्ण होईल,” असा विश्वास त्यांनी व्यक्त केला.
कार्यक्रमाचे सूत्रसंचालन विकास पाटील यांनी तर आभार प्रदर्शन विद्यालयाचे प्राचार्य शरद पाटील यांनी केले.
कार्यक्रमास शिक्षक, शिक्षकेतर कर्मचारी व विद्यार्थ्यांचा उत्स्फूर्त सहभाग लाभला.
