नंदुरबार l प्रतिनिधी
येथील छत्रपती शिवाजी महाराज नाट्यगृहाच्या प्रांगणात जिभाऊ करंडक राज्यस्तरीय एकांकिका स्पर्धेच्या आयोजनाबाबत ची बैठक संपन्न झाली. बैठकीच्या अध्यक्षस्थानी आयोजन समितीचे सदस्य तथा नाट्यकर्मी मनोज सोनार हे होते.
गेल्या बारा वर्षापासून जिभाऊ करंडक राज्यस्तरीय एकांकिका स्पर्धेचे सातत्यपूर्ण आयोजन होत आहे. सदर आयोजन गाडगेबाबा शैक्षणिक व सांस्कृतिक सेवा मंडळ, शिंदे यांच्या तर्फे राज्यपुरस्कृत शिक्षक जयदेव लिंबा पेंढारकर तथा जिभाऊ यांच्या स्मरणार्थ करण्यात येते. या स्पर्धेत राज्यभरातील नाट्यसंस्था व महाविद्यालये सहभागी होऊन आपला नाट्याविष्कार सादर करीत असतात. सदर बैठकीत जिभाऊ करंडक स्पर्धेत सहभागी होणारे संघ व कलावंत स्पर्धकांचे नियोजन या बाबत चर्चा करण्यात आली.
तसेच या बैठकीदरम्यान नाट्यकर्मी नागसेन पेंढारकर यांनी स्पर्धेच्या यशस्वी आयोजनाबाबत आपले विचार मांडले. तसेच या वर्षी नंदुरबार जिल्ह्यातील महाविद्यालय व विविध नाट्यसंस्था यांना भेटी देऊन स्पर्धेत सहभागी होण्याबाबत आवाहन करण्यात येईल असे देखील सांगितले. जिभाऊ करंडक ही स्पर्धा महाराष्ट्रातील प्रमुख एकांकिका स्पर्धेपैकी एक स्पर्धा आहे. या जिभाऊ करंडक मुळे नंदुरबार जिल्ह्यात नाट्य चळवळ जोमाने उभी राहिली असून जिभाऊ करंडक च्या दरम्यान नंदुरबार जिल्ह्यातील नाट्यसंस्था देखील सहभागी होतील असा विश्वास देखील नागसेन पेंढारकर यांनी व्यक्त केला. या स्पर्धेच्या माध्यमातून नंदुरबार जिल्ह्यातील कलावंतांना व रसिकांना विविध नाट्य अविष्कार अनुभवयास मिळत असतात. तसेच या स्पर्धेच्या माध्यमातून जिल्ह्यात नाट्यकलावंत व नाट्यतंत्रज्ञ देखील तयार होत आहेत असे मत मनोज सोनार यांनी व्यक्त केले.
जिभाऊ करंडकच्या या बैठकीत नाट्यकर्मी राजेश जाधव, विश्व हिंद धर्म सेवा संस्थेचे अध्यक्ष कुणाल वसईकर, रविंद्र कुलकर्णी, तुषार ठाकरे, काशिनाथ सूर्यवंशी, आशिष खैरनार यांनी जिभाऊ करंडकच्या नियोजनाबाबत आपले मत व्यक्त करीत जिभाऊ करंडक यशस्वी होण्याबाबतचा विश्वास व्यक्त केला. या बैठकीत राज्य नाट्य स्पर्धेत सहभागी कलावंतांचे कौतुक करण्यात आले. जिभाऊ करंडक च्या या बैठकीत जितेंद्र खवळे, तुषार सांगोरे, पुरुषोत्तम विसपुते, जितेंद्र पेंढारकर, पार्थ जाधव, रोहित हराळे, चंद्रमणी गोल्हाईत, सागर कदम, रत्नदीप पवार आदी उपस्थित होते.
