नंदूरबार l प्रतिनिधी
ए.टी.एम.मशीनमध्ये कॅश भरण्यासाठी दिलेली १ कोटी ५ लाख रुपयांची रोकड कर्मचाऱ्याने लंपास केल्याची घटना घडली. या घटनेच्या पार्श्वभूमीवर शहरात पोलिसांनी नाकाबंदी केली आहे.
नंदुरबार येथील स्टेट बॅँकेतून रायटर कार्पोरेशन कंपनीचे कर्मचारी एक कोटी ५ लाख रुपयांची रक्कम घेऊन विविध एटीएमध्ये भरणा करण्यासाठी निघाले. शहरातील धुळे चौफुलीजवळ सदरची व्हॅन थांबवून एका फायनान्स कंपनीकडून कॅश कलेक्शनसाठी काही जण गेले होते. तेवढ्यात कंपनीचा कर्मचारी असलेला नंदुरबार येथील राकेश चौधरी याने मिळालेल्या वेळेत पोलिस मुख्यालय तसेच विविध ठिकाणच्या एटीएमध्ये भरणा करुन येतो असे सांगून व्हॅनमधील एक कोटी ५ लाखांची रोकड ताब्यात घेऊन तो दुचाकीने निघाला.
यावेळी व्हॅनमध्ये सुरक्षारक्षक, एक कर्मचारी व चालक असे तिघेजण होते. राकेश रक्कम घेऊन जाण्यास तास-दीड तासांचा कालावधी उलटल्यानंतरही तो परत न आल्याने व्हॅनमधील कर्मचाऱ्यांनी कंपनीशी संपर्क साधला. यानंतर कंपनीने राकेशशी संपर्क साधल्यानंतर त्याचा मोबाईल देखील बंद येत होता. यामुळे तो रफुचक्कर झाल्याची खात्री पटल्याने कंपनीने ११२ क्रमांक डायल केला. यानंतर घटनास्थळी पोलिस पथक रवाना झाले. मात्र तोपर्यंत सुमारे दोन ते अडीच तासांचा कालावधी उलटला होता.
घटनास्थळी अपर पोलिस अधिक्षक निलेश तांबे, उपविभागीय पोलिस अधिकारी संजय महाजन, स्थानिक गुन्हा शाखेचे पोलिस निरीक्षक किरणकुमार खेडकर, शहर पोलिस निरीक्षक रविंद्र कळमकर आदींनी पथकासह भेट दिली. दरम्यान, सदरची व्हॅन नंदुरबार शहर पोलिस ठाण्यात जमा करण्यात आली आहे. एटीएममध्ये भरणा करायाची रक्कम सात एटीएममध्ये जमा केली जाणार होती. यामध्ये पोलिस मुख्यालय येथील एटीएम, आमदार कार्यालयाजवळील एटीएम, एसबीआय इनटचचे एटीएम, शास्त्री मार्केटमधील एटीएम व दोंडाईचा येथील दोन एटीएममध्ये सदर रकमेचा भरणा केला जाणार होता.
मात्र त्याआधीच राकेशने सदर रकमेचा अपहार केल्याचा संशय कंपनीकडून व्यक्त करण्यात आला आहे. दरम्यान, सदर घटनेनंतर पोलिस यंत्रणेने तपासाची चक्रे गतिमान केली असून ठिकठिकाणी नाकाबंदी देखील केली आहे. शहर पोलिस ठाणे व स्थानिक गुन्हा शाखेच्यावतीने ठिकठिकाणी पोलिस पथक देखील रवाना करण्यात आले आहेत. पोलिसांनी व्हॅनमधील इतर कर्मचाऱ्यांना देखील ताब्यात घेतले आहे.