नंदुरबार l
येथील नगर पालिकेच्या थकबाकीदारांकडे जावून केवळ चार आठवड्यात ६० लाख रुपयांची थकित कर वसुली केल्याने पालिकेचे वसुली लिपीक सय्यद वाजीदअली मुस्ताक अली यांचा पालिकेचे तत्कालिन मुख्याधिकारी पुलकित सिंह यांच्या हस्ते प्रमाणपत्र देवून गौरव करण्यात आला.
नंदुरबार शहरातील मालमत्ताधारक यांनी सन २०२२-२३ अखेरपर्यंत मालमत्ता कर व इतर कर भरलेला नसल्यामुळे मालमत्ता कर वसुलीबाबतची मोहिम दि.१३ मे २०२३ पर्यंत सुरु ठेवणेबाबत विभागीय आयुक्त नाशिक यांचे निर्देश होते. त्यानुसार वसुली विभागातील वसुलीचा आढावा पालिकेचे प्रभारी मुख्याधिकारी पुलकित सिंह यांनी घेतला असता नगर परिषदेची वसुली अत्यंत कमी प्रमाणात असल्यामुळे जे थकबाकीदार आहेत त्यांना नोटीस पुन्हा देणे तसेच वृत्तपत्रात जाहीर सुचना प्रसिदधी करुन मालमत्ता कर भरण्याबाबत आवाहन करण्यात आलेले होते. मालमत्ता कर वसुलीची नोटीस मोहिम १३/४/२०२३ रोजी पासून कार्यवाही सुरु करण्यात आली होती.
नगर परिषदेकडून देण्यात आलेल्या नोटीसच्या मुदतीनंतर जे मालमत्ताधारक थकबाकीदार आहे, अशा मालमत्ता सील करुन जप्त करण्याची कार्यवाही सुरु करण्यात आली होती. दरम्यान, पालिकेचे वसूली लिपीक सय्यद वाजीदअली मुस्ताक अली यांनी दि.१३/४/२०२३ ते दि. १२/५/२०२३ या कालावधीत एकूण ५९ लाख ३१ हजार ८२७ रुपयांची एव्हढी रक्कम थकबाकीदार यांच्याकडून वसुल केलेली आहे. दरम्यान, सय्यद यांनी त्यांच्या भागातील मालमत्ता कर व इतर कर वसुलीचे काम समाधानकारकरित्या पूर्ण केल्याने पालिकेचे तत्कालिन मुख्याधिकारी पुलकित सिंह यांच्या हस्ते सय्यद यांचा प्रमाणपत्र देवून गौरव करण्यात आला. तसेच भविष्यातही आपण सेवेत असेपर्यंत यापुढे चांगले काम करावे, अशी अपेक्षाही सिंह यांनी व्यक्त केली आहे.
