नंदुरबार l
नंदुरबार ते खांडबारा रस्त्यावरील भादवड गावाजवळ दुचाकींच्या झालेल्या धडकेत दोघे जखमी झाले असून एका दुचाकी चालकाविरोधात गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, नंदुरबार शहरातील कोकणी हिल येथील दिलीप वसंत गावित व शोभा मगन गावित हे दुचाकीने (क्र.एम.एच.४८ डब्ल्यू ५६३४) नंदुरबारकडून भादवड येेथे येत होते. यावेळी शब्बीर टेलर याने त्याच्या ताब्यातील दुचाकी (क्र.जी.जे.२६ बी १७३५) रस्त्याच्या परिस्थितीकडे दुर्लक्ष करुन भरधाव वेगात भादवड गावाजवळ दुचाकीला मागून धडक दिल्याने अपघात घडला.
घडलेल्या अपघातात दिलीप गावित व शोभा गावित यांना दुखापत झाली असून दोन्ही दुचाकींचेही नुकसान झाले. याबाबत दिलीप गावित यांच्या फिर्यादीवरुन विसरवाडी पोलिस ठाण्यात शब्बीर टेलर याच्याविरोधात भादंवि कलम २७९, ३३७, ३३८, ४२७ सह मोटार वाहन कायदा कलम १८४ प्रमाणे गुन्हा दाखल करण्यात आला आहे. पुढील तपास पोहेकॉ.सुरेश मोरे करीत आहेत.
