नंदुरबार l प्रतिनिधी
शहरातील अतिक्रमणाचा मुद्दा ऐरणीवर आला असून नगरपालिका प्रशासनाने शहरातील अतिक्रमणांवर कारवाईचा इशारा दिला आहे.
अतिक्रमण काढा अन्यथा ओटे तोडून अतिक्रमण काढण्याचा खर्च अतिक्रमण करणाऱ्यांकडून वसूल करण्याचा सज्जड दम दिला आहे. पालिकेचे प्रभारी परिविक्षाविधीन आएएस मुख्याधिकारी पुलकित सिंह यांनी दिला आहे.
नंदुरबार शहरातील सार्वजनिक रस्त्यालगत केलेले अतिक्रमण,सार्वजनिक ठिकाणी हातगाड्या लावणे,तसेच छोट्या टपऱ्या, ओटे, घराच्या बांधकामाच्या पायऱ्या काढून रस्त्यावर मोठ्या प्रमाणात अतिक्रमण केल्याचे आढळून आले आहे.त्यामुळे सार्वजनिक वापराच्या रस्त्याची रुंदी कमी होवून वाहतुकीसाठी अडथळा निर्माण केलेला आहे.रस्त्याच्या रुंदीमुळे लहान-मोठे अपघात होतात.या कारणामुळे शहरातील विविध संस्था व नागरिक यांचे अतिक्रमणबाबत वारंवार तक्रारी पालिकेला प्राप्त झाल्या आहेत. नंदुरबार नगरपरिषदेकडून सोमवार दि.२४ एप्रिल रोजी अतिक्रमण हटाव मोहिम राबविण्यात येणार आहे.
यामुळे ज्या नागरिकांनी सार्वजनिक ठिकाणी अतिक्रमण केेले आहे त्यांनी स्व-खर्चाने दि.२१ एप्रिलपर्यंत अतिक्रमण काढून घेण्याच्या सूचना पालिकेच्यावतीने देण्यात आल्या आहेत.दरम्यान, ज्या नागरिकांकडून दिलेल्या मुदतीत अतिक्रमण हटविण्यात येणार नाही, अशा ठिकाणी पालिकेकडून अतिक्रमण हटविण्यात येणार असून याचा खर्च संबंधितांकडून वसूल करण्यात येणार असल्याचा इशारादेखील प्रभारी मुख्याधिकारी पुलकीत सिंह यांनी दिला आहे. दरम्यान, पालिका अतिक्रमण मोहिम हटावसाठी ॲक्शन मोडमध्ये येत असल्याने या निर्णयाचे अनेकांकडून कौतुकदेखील करण्यात येत आहे.
