मोठ्ठी बातमी : नंदूरबार तालुक्यातील सात ठिकाणी घरफोडी करणाऱ्या टोळीला ठोकल्या बेड्या, साडे नऊ लाखाचा मुद्देमाल हस्तगत

नंदूरबार l प्रतिनिधी

घरफोडी करणाऱ्या टोळीला स्थानिक गुन्हे शाखेने बेड्या ठोकल्या असून 7 गुन्हे उघड करुन 9 लाख 50 हजार रुपये किमतीचा मुद्देमाल हस्तगत केला आहे.

नंदुरबार जिल्हा पोलीस गुन्हे बैठकीत जिल्ह्यातील मालमत्तेविरुध्दचे घरफोडी, चोरी इत्यादी गुन्ह्यांचा गुन्हे आढावा दरमहा घेण्यात येत असतो. नंदुरबार जिल्ह्यातील विविध पोलीस ठाणे हद्दीत घरफोडीचे गुन्हे दाखल आहेत. तसेच पोलीसांसमोर चोरट्यांना जेरबंद करुन घडलेले गुन्हे उघडकिस आणून मुद्देमाल हस्तगत करणे हे मोठे आव्हान होते. त्याअनुषंगाने घरफोडीच्या गुन्ह्यांचा गांभीर्याने तपास करुन सक्रीय गुन्हेगारांवर कारवाई करण्याबाबत पोलीस अधीक्षक पी. आर. पाटील यांनी निर्देश गुन्हे बैठकीत सर्व पोलीस ठाणे प्रभारी अधिकाऱ्यांना दिले.

वरिष्ठांच्या सुचना व मार्गदर्शनानुसार स्थानिक गुन्हे शाखेचे पोलीस निरीक्षक किरणकुमार खेडकर यांनी नंदुरबार जिल्ह्यातील विविध पोलीस ठाणे अंतर्गत घरफोडीच्या गुन्ह्यांच्या पध्द्तीचा अभ्यास करुन वारंवार चोरी होणारे ठिकाण, वेळ, दिवस यांची इत्यंभूत माहिती घेवुन रेकॉर्डवरील जेलमधुन सुटुन आलेल्या गुन्हेगारांवर पाळत ठेवून होते. तसेच आपले बातमीदारांमार्फत माहिती घेवून मोटर सायकल चोरांचा शोध घेत होते.

दि. 29 मार्च रोजी पोलीस अधीक्षक पी. आर. पाटील यांना गुप्त बातमीदारामार्फत बातमी मिळाली की, नंदुरबार शहरातील वेडुभाऊ गोविंद नगरमध्ये एक धुळे जिल्ह्याच्या साक्री तालुक्यातील धनेर गावाचा तरुण राहात असून काही एक काम धंदा करीत नाही तसेच त्याच्या हालचाली ह्या संशयास्पद वाटत आहे अशी बातमी मिळाल्याने, सदरची माहिती त्यांनी स्थानिक गुन्हे शाखेचे पोलीस निरीक्षक किरणकुमार खेडकर यांना सांगितली. पोलीस निरीक्षक श्री. खेडकर यांनी तात्काळ स्थानिक गुन्हे शाखेचे एक पथक तयार करुन त्यांना मिळालेल्या बातमीमधील संशयीतास ताब्यात घेवून पुढील कारवाई करण्याचे आदेश दिले.

स्थानिक गुन्हे शाखेच्या पथकाने नंदुरबार शहरातील वेडूभाऊ गोविंद नगर परिसरात जावून संशयित हेमंत सोनवणे याचा शोध घेतला असता तो कन्यादान मंगल कार्यालय परिसरात फिरत असल्याचे समजून आल्याने पथकाने कन्यादान मंगल कार्यालयाजवळ एका काळया रंगाच्या युनिकॉर्न मोटार सायकलवर हेमंत अनिल सोनवणे वय 25 वर्षे रा. धनेर ता. साक्री जि. धुळे ह.मु. वेडूगोविंद नगर, नंदुरबार मिळून आला त्यास विचारपूस करीत असतांना तो उडवा उडवीची उत्तरे देवू लागल्याने त्याची अंगझडती घेतली असता, त्याच्या खिशात एक गुलाबी रंगाचे श्री ज्वेलर्स असे लिहिलेले पाकीट मिळुन आले. त्यात 3 लाख 90 हजार 875 रुपये किमतीचे सोन्याचे विविध दागिने मिळून आल्याने त्यास त्याबाबत विचारपूस केली असता, त्याने सुरुवातीला उडवा उडवीची उत्तरे देत असल्याने त्यास विश्वासात घेवून विचारपुस केली असता, त्याने सदरचे सोन्याचे दागिने हे त्याचे इतर दोन साथीदार तुलशिराम उर्फ तुलशिदास रा.मचमाळ ता. साक्री जि.धुळे, अनिल पवार रा. तोरणकुडी पो.धनेर ता. साक्री जि.धुळे अशांच्या मदतीने तीन दिवसापुर्वी नंदुरबार शहरातील कोकणीहिल परिसरातील एका बंद घराचे कुलुप, कडीकोयंडा तोडून चोरी केल्याचे सांगितले. त्याबाबत नंदुरबार शहर पोलीस ठाण्यात भा.द.वि. कलम 457,380, उपनगर पोलीस ठाण्यात भा.दं.वि. कलम 454,457,380 प्रमाणे गुन्हा दाखल आहे.

तसेच सुमारे दोन महिन्यापुर्वी वृंदावन कॉलनी, नंदुरबार येथील हनुमान मंदिर गेट समोरील एका बंगल्याचे बंद दरवाज्याचे कडीकोंयडा तोडून ( घरफोडी करुन) चोरी केली असल्याचे सांगितले. हेमंत अनिल सोनवणे याच्या ताब्यात मिळून आलेल्या सोन्याचे दागिने व मोटार सायकल कायदेशीर कारवाई करुन जप्त करण्यात आली.

संशयीत आरोपीताकडुन नंदुरबार जिल्हयातील मालमत्तेविरुध्दचे गुन्हे उघडकीस येण्याची शक्यता असल्याने त्यास स्थानिक गुन्हे शाखा, नंदुरबार येथे आणून अधिक विचारपुस केली असता, त्याने व त्याचे इतर दोन साथीदार यांचे मदतीने नंदुरबार शहरातील सुमारे चार महिन्यापुर्वी गाझी नगर लगत असलेली बॅटरी इन्व्हर्टर दुकान तसेच एस्सार पेट्रोलपंप शेजारी बॅटरी इन्व्हर्टरचे दुकानाचे शटरचे कुलुप तोडुन इन्व्हर्टर व बॅटऱ्या, नंदुरबार शहरातीलच वृंदावन कॉलनी, वर्धमान नगर, वेडुभाऊ गोविंद नगर येथील बंद घराचे कुलुप, कोयंडा तोडून घरफोडी करून सोन्याचे दागिने व रोख रक्कम, LED TV तसेच नंदुरबार तालुका पोलीस ठाणे हद्दीतील शिवपूर व अंबापूर परिसरातील व इतर शेत शिवारातील सौर ऊर्जा प्लेट चोरी केलेबाबत सविस्तर हकिगत सांगितले.

ताब्यात घेण्यात आलेला हेमंत अनिल सोनवणे यास त्याने चोरी केलेला मुद्देमालाबाबत विचारले असता चोरी केलेल्या 2 मोटार सायकलच्या बॅटऱ्या व 1 इन्व्हर्टर त्याचे धानोरा येथील गॅरेजमधून अनोळखी इसमांना विक्री केल्याचे व उर्वरीत बॅटऱ्या व 4 इन्व्हर्टर त्याच्या धनेर ता. साक्री जि.धुळे येथील त्याच्या राहते घरी लपवून ठेवल्याचे सांगितले.

वेडुभाऊ गोविंद नगर येथे केलेल्या चोरीमधील चोरी केलेले काही सोन्याचे दागिने त्याचा नंदुरबार शहरातील एका सोनार मित्रास विक्री केल्याचे सांगितले. त्याबाबत नंदुरबार शहर पोलीस ठाण्यात भा.दं.वि. कलम 457,380 प्रमाणे गुन्हा दाखल आहे. स्थानिक गुन्हे शाखेच्या पथकाने 68 हजार 500 रुपये किमतीच्या 7 बॅटऱ्या व 16 हजार रुपये किमतीचे 4 इनव्हर्टर जप्त केलेले आहे. त्याबाबत नंदुरबार शहर पोलीस ठाण्यात दोन गुन्हे दाखल असल्याचे निष्पन्न झाले आहे. तसेच LED TV व सौर उर्जेच्या प्लेट त्याचे दोन साथीदार तुलशिराम उर्फ तुलशिदास भिल्लू चौरे रा.मचमाळ ता. साक्री, अनिल गणेश पवार रा. तोरणकुडी पो.धनेर ता. साक्री जि.धुळे यांच्याकडे असून दोन्ही संशयीत आरोपी LED TV विक्री करण्यासाठी नंदुरबार शहरात वॅगन आर वाहनाने येणार असल्याचे सांगितले.

स्थानिक गुन्हे शाखेच्या पथकाने नंदुरबार शहरातील नवापूर चौफुली परिसरात साक्री कडुन येणाऱ्या रस्त्यावर साध्या वेशात सापळा रचला. त्याच दरम्याने साक्री गावाकडुन नंदुरबारच्या दिशेने एक आकाशी रंगाची वॅगनआर कंपनीची गाडी येत असल्याचे दिसली म्हणून सदर वाहन थांबवुन वाहनातील दोन इसमांना त्यांचे नाव विचारले असता, तुलशिराम उर्फ तुलशिदास भिल्लु चौरे रा. मचमाळ ता. साक्री जि. धुळे, अनिल गणेश पवार रा. तोरणकुडी पो. धनेर ता. साक्री जि.धुळे असे सांगितले. वॅगन आर वाहनाची पाहणी केली असता वाहनात दोन LED TV, एक आयकॉनिक कंपनीचे काळया रंगाचे हेअर ड्रायर, एक लोखंडी कैची कटर मिळुन आल्याने त्यांना त्याबाबत विचारपुस केली असता, त्यांनी ते दोन्ही TV व हेअर ड्रायर त्यांचा साथीदार हेमंत सोनवणे याच्या मदतीने नंदुरबार शहरात घरफोडी करुन चोरी केली असल्याचे सांगितल्याने सदर दोन्ही LED TV, हेअर ड्रायर व वॅगन आर कंपनीचे वाहन कायदेशीर कारवाई करुन जप्त करण्यात आले आहे.

ताब्यात घेण्यात आलेले तुलशिराम उर्फ तुलशिदास भिल्लू चौरे, अनिल पवार यांना चोरी केलेल्या सौर प्लेटबाबत विचारपूस केली असता त्यांनी त्या सौर प्लेट त्यांच्या घराच्या बाजूला लपवून ठेवल्याचे सांगितल्याने स्थानिक गुन्हे शाखेच्या पथकाने EN KON कंपनीच्या 15 सौर ऊर्जा प्लेट व एक बॉक्स, अडानी कंपनीच्या 13 सौर उर्जा प्लेट व एक बॉक्स तसेच ANCHER कंपनीच्या एकुण 8 सौर उर्जा प्लेट, LIVBAT कंपनीच्या एकुण 9 सौर उर्जा प्लेट अशा एकुण 1 लाख 78 हजार रुपये किमतीच्या एकुण 45 सौर प्लेट व दोन बॉक्स कायदेशीर प्रक्रिया करुन हस्तगत करण्यात आलेल्या आहेत. त्याबाबत नंदुरबार जिल्ह्यातील पोलीस ठाण्याचा गुन्हे अभिलेखाची पडताळणी केली असता तालुका व उपनगर पोलीसात गुन्हे दाखल असल्याचे निष्पन्न झाले.

ताब्यात घेण्यात आलेले हेमंत अनिल सोनवणे रा. धनेर ता. साक्री जि. धुळे ह.मु. वेडूगोविंद नगर, नंदुरबार ता. जि. नंदुरबार, तुलशिराम उर्फ तुलशिदास भिल्लु चौरे रा.मचमाळ ता. साक्री जि.धुळे, अनिल गणेश पवार रा. तोरणकुडी पो. धनेर ता. साक्री जि. धुळे यांच्याकडून सोन्याचे दागिने, 45 सौर प्लेट, 07 इनव्हर्टर, 02 सौर प्लेट बॉक्स, 4 बॅटऱ्या, 2 LED TV, हेअर ड्रायर मशिन, एक लोखंडी कटर असा एकुण 9 लाख 50 हजार 875 रुपये किमतीचा मुद्देमाल मिळून आल्याने तिन्ही आरोपीतांना गुन्ह्याच्या पुढील कारवाईकामी उपनगर पोलीस ठाण्याच्या ताब्यात देण्यात आले आहे.

ताब्यात घेण्यात आलेल्या आरोपीतांकडून नंदुरबार जिल्ह्यातील नंदुरबार शहर, उपनगर, नंदुरबार तालुका पोलीस ठाण्यातील सात गुन्हे उघडकीस आले आहेत.

ताब्यात घेण्यात आलेल्या संशयित आरोपीतांकडून नंदुरबार जिल्ह्यातील मालमत्तेविरुध्दचे एकुण 7 गंभीर गुन्हे उघडकीस आणून 9 लाख 50 हजार 875 रुपये किमतीचा मुद्देमाल हस्तगत करुन उत्कृष्ट कामगिरी करणाऱ्या पथकास पोलीस अधीक्षक पी. आर. पाटील यांनी स्थानिक गुन्हे शाखेच्या पथकास 10 हजार रुपये रोख बक्षिस जाहीर केले.

सदरची कामगिरी पोलीस अधीक्षक पी. आर. पाटील, अपर पोलीस अधिक्षक निलेश तांबे, शहादा विभागाचे उप विभागीय पोलीस अधिकारी श्रीकांत घुमरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, सहा. पोलीस निरीक्षक संदीप पाटील, पोलीस नाईक राकेश मोरे, दादाभाई मासुळ, पोलीस अंमलदार किरण मोरे, राजेंद्र काटके, शोएब शेख, अभय राजपुत, आनंदा मराठे यांच्या पथकाने केली आहे.