चिनोदा.ता.तळोदा | वार्ताहर
एकलव्य आदिवासी युवा संघटनेच्या वतीने दि.२२ नोव्हेंबर रोजी करण्यात येणाऱ्या रस्ता रोको आंदोलनाबाबत एकलव्य आदिवासी युवा संघटनेच्या वतीने नंदुरबार जिल्हाधिकारी, पोलिस अधिक्षक नंदुरबार, उपजिल्हाधिकारी तळोदा, तहसिलदार तळोदा, पोलिस निरीक्षक तळोदा यांना निवेदन देण्यात आले.
या निवेदनात म्हटले आहे की, एकलव्य आदिवासी युवा संघटनेच्या वतीने दि.३ नोव्हेंबर २०२२ रोजी गुऱ्हाळ मालक व साखर कारखानदार, श्रीकृष्ण खांडसरी तळोदा, दसवड खांडसरी, समशेरपुर खांडसरी, कुकरमुंडा खांडसरी, चिखली खांडसरी विरोधात उचल रक्कम व अंतिम बिल रक्कम जाहीर बाबत प्रशासनास निवेदन देण्यात आले होते.
मात्र उपरोक्त प्रमाणे दाखल न घेतल्याने एकलव्य आदिवासी युवा संघटना व शेतकर्यांच्या वतीने दि.२२ नोव्हेंबर २०२२ रोजी बऱ्हाणपूर-अंकलेश्वर महामार्गावरील नळगव्हाण, ता.तळोदा येथे ठीक ११ वाजता रस्ता रोको आंदोलन परिसरातील शेतकरी व संघटनेच्या वतीने करण्यात येणार आहे.
तरी गुऱ्हाळ मालक व साखर कारखानदारांना प्रशासन मार्फत बोलणी करण्यासाठी निवेदन देवून देखील प्रशासनाने संवाद घडवून तोडगा न काढल्याने रस्ता रोको दरम्यान काही अनुचित प्रकार घडल्यास त्याची सर्वस्वी जबाबदार प्रशासन राहील असा निवेदनातून इशारा देण्यात आला आहे.
निवेदन देतांना एकलव्य आदिवासी युवा संघटनेचे महाराष्ट्र प्रदेश प्रवक्ता ॲड.गणपत पाडवी, भिका दादा, शंकर दादा, फतेसिंग पाडवी आदी उपस्थित होते.
