नंदुरबार । प्रतिनिधी
तालुक्यातील रजाळे येथे शेत शिवारात मध्यरात्री मेंढ्यांच्या कळपावर ४ ते ५ लांडग्यांच्या टोळीने हल्ला करून तब्बल ११ मेंढ्यांचा फडशा पाडला आहे. या हल्ल्यात मेंढपाळाचे सुमारे एक लाखाचे नुकसान झाले आहे. या घटनेचा वनविभागाच्या कर्मचाऱ्यांनी पाहणी करून पंचनामा केला आहे.
याबाबत अधिक माहिती अशी की , रजाळे येथील डेमा ठेलारी यांच्या मेंढ्यांचा कळपा आपल्या शेतातच असल्याने रात्री १ वाजेच्या सुमारास अचानक चार ते पाच लांडग्यांनी मेंढ्यांवर हल्ला चढवून यात दहा मेंढ्या व एक कोकरू अशी ११ जनावरे फस्त केली आहेत.
यामुळे ठेलारी कुटुंबियांमध्ये रात्रीच्या सुमारास ही घटना घडल्याने भीतीचे वातावरण निर्माण झाले होते परिसरात कोणीही नसल्याने कुटुंबियांवर घबराट निर्माण झाली होती सुदैवाने लांडग्याच्या हल्यात ते बचावले आहेत.
तसेच त्यांच्या मेंढ्यांच्या कळपामध्ये १५० ते २०० मेंढ्या होत्या यात ११ मेंढ्या लांडग्यांनी ठार केले आहे. यामुळे डेमा ठेलारी यांचे एक ते दीड लाख रुपयांचे नुकसान झाले आहे. या घटनेचा वन विभागाकडून पंचनामा करण्यात आला आहे. यावेळी वनविभागाचे कर्मचारी तांबोळी व पशुवैद्यकीय अधिकारी डॉ. नाना पाटील, सावळीराम करिया, सिदा होडगर , डेमा ठेलारी आदी यावेळी पंचनामा करते वेळी उपस्थित होते. सदर घटनेमुळे परिसरात शेतकऱ्यांमध्ये भीतीचे वातावरण निर्माण झाले आहे.
