नंदुरबार l प्रतिनिधी
नंदूरबार जिल्ह्यातील प्रकाशा येथून व्यापाऱ्याला भुरळ घालून सोनसाखळी चोरणाऱ्या महिलेस लासलगाव पोलिसांनी अटक केली. अश्विन बाळकृष्ण सोनार (रा. प्रकाशा, शहादा, जि. नंदुरबार) यांच्या फिर्यादीवरून शहादा पोलीस ठाण्यात गुन्हा दाखल करण्यात आला होता.
प्रकाशा येथे दि. २० मे रोजी सकाळी ९ वाजेच्या सुमारास सोनार गल्लीतील परिणीता ज्वेलर्स या सराफाच्या दुकानातून दोन महिलांनी काऊंटरवरील गल्ल्यात हात घालून ७ लाखांचे दागिने असलेला डबा लंपास केला होता.
या चोरीची घटना सीसीटीव्ही मध्ये कैद झाली आहे. दुकानाबाहेर दोन तरुण देखील उभे असल्याचे कॅमेऱ्यात दिसत होते. याबाबत पोलीस ठाण्यात गुन्हा दाखल करण्यात आला होता.
लासलगाव पोलीस ठाणे हद्दीत दररोज गस्तीसाठी साध्या वेशात पोलीस पथक तयार करण्यात आलेले आहे. वरील दाखल गुन्ह्याच्या अनुषंगाने गुन्ह्याचे तपासी अधिकारी राजन मोरे, सहायक पोलीस निरीक्षक शहादा पोलीस ठाणे यांनी व्हॉटसॲप सोशल मीडियावर संशयित महिलांचे फोटो व्हायरल केले होते.
फोटोच्या निरीक्षक माहितीच्या आधारे संजयनगर, लासलगाव जिल्हा नाशिक येथील सरला कापसे (३०) हिची तिच्या राहत्याघरी झडती घेण्यात आली. तिच्या ताब्यात सोन्याच्या धातूच्या पोत, मणी, मंगळसूत्र मिळून आल्याने त्या सोन्याच्या वस्तूबाबाकडे विचारपूस केली असता तिने उडवाउडवीची उत्तरे दिली.
तेव्हा त्या महिलेस पोलीस स्टेशन येथे घेऊन येऊन तिच्याकडे सखोल चौकशी केली असता तिने मीना कापसे व रामदास शिंदे यांच्यासोबत परिणीता ज्वेलर्स, प्रकाशा, ता. शहादा, जिल्हा नंदुरबार येथून चोरी केली असल्याची कबुली दिली आहे.
त्या महिलेकडून अंदाजे 90 हजार रुपये किमतीचे सोन्याचे दागिने जप्त केले आहे.ही कामगिरी सहाय्यक पोलीस राहुल वाघ यांच्या मार्गदर्शनाखाली पथकाने ही कामगिरी केली आहे.
