म्हसावद l प्रतिनिधी
शहादा तालुक्यातील मंदाणे येथील माहेर असलेल्या सरोज उमाकांत देसले यांची वनपाल पदावरून बढती मिळून धुळे वनविभागात वनक्षेत्रपाल पदावर नुकतीच नियुक्ती करण्यात आली आहे. या नियुक्तीबद्दल मंदाणे गावात त्यांचे कौतुक होत आहे.
सरोज देसले या मंदाणे येथील आदर्श विद्यालय व कनिष्ठ महाविद्यालयातील निवृत्त शिक्षक कै. ए .व्ही. पाटील यांची कन्या व शिक्षक हरीश पाटील यांच्या भगिनी आहेत.
त्यांनी मराठी शाळेत प्राथमिक शिक्षण पूर्ण केले.त्या नंतर त्यांनी आदर्श विद्यालय व कनिष्ठ महाविद्यालयात पाचवी ते बारावी पर्यंत शिक्षण घेऊन नाईक महिला महाविद्यालय शहादा येथे पदवी प्राप्त केली.
त्यानंतर झोडगे ता. मालेगाव येथील माध्यमिक शिक्षक उमाकांत विश्वासराव देसले यांचेशी विवाहबद्ध झाल्या. वैवाहिक जीवन जगत असतानाही त्यांनी वनपाल पदासाठी घेण्यात आलेल्या सरळ सेवा भरती परीक्षेत भरघोस यश मिळवले.
त्यावेळी त्यांची धुळे वन विभागात वनपाल म्हणून नेमणूक करण्यात आली. तब्बल ११ वर्षे सेवा बजावत असताना त्यांच्या कामाची दखल घेऊन त्यांना धुळे वनक्षेत्रपाल पदावर नुकतीच पदोन्नती देण्यात आली. मंदाणे गावाच्या सुकन्या असलेल्या सरोज देसले यांनी पहिल्या महिला वनक्षेत्रपाल म्हणून मान मिळवला आहे. या नियुक्तीबद्दल त्यांचा मंदाणे ग्रामस्थांच्या वतीने सन्मान करण्यात येणार आहे.
