नंदुरबार l प्रतिनिधी
राष्ट्रवादी काँग्रेस पक्षाचे आमदार अमोल मिटकरी याने सांगली येथील राष्ट्रवादी काँग्रेस पक्षाचा परिसंवाद मेळाव्यात भाषण करतांना हिंदु धर्माचे श्रद्धास्थान असलेल्या मारुती स्तोत्राची चेष्टा केली तसेच हिंदु धर्मातील विवाह संस्कारातील पवित्र कन्यादान विधीबद्दल जाणून बुजून केलेले वक्तव्य बेताल, खोटे असून मिटकरींनी हिंदूधर्म परंपरेची खिल्ली उडविली म्हणून आ. अमोल मिटकरी याच्यावर हिंदु सेवा सहाय्य समितीचे नरेंद्र परशराम पाटील यांनी नंदुरबार शहर पोलीस ठाण्यात लेखी तक्रार देऊन अमोल मिटकरीवर भादवि कलम १५३(अ), २९५(अ) अंतर्गत गुन्हा दाखल करण्यासाठी लेखी तक्रार दाखल केली.
तक्रारीत पुढे म्हटले आहे की, हिंदू धर्मात विवाह संस्कारातील कन्यादान विधी अत्यंत पवित्र कार्य असून त्या विधीद्वारे दोन परिवारात आणि वधू-वर यांच्यात पवित्र संबंध निर्माण होतात तसेच कन्यादान केल्यानंतर मुलीला संसारात सौभाग्य प्राप्त होते कन्यादान विधीमध्ये ‘मम भार्या समर्पयामि’ असा कुठलाही मंत्र नाही अथवा विवाहात असा मंत्र उच्चार केला जात नाही असे माहिती असतांना ही हिंदू धर्म आणि संस्कृती मधील कोणत्याही धार्मिक विधी बद्दल कुठलीही शास्त्रोक्त माहिती नसतांना अमोल मिटकरी यांनी जाणून बुजून हिंदूंचा धार्मिक भावना दुखावण्याचा उद्देशाने हे वक्तव्य केले आहे तसेच मारुती स्तोत्राची चेष्टा करून रामभक्त हनुमान बद्दल असलेल्या श्रद्धेचा जाणून बुजून अपमान केलेला आहे. यामुळे धार्मिक भावना दुखावल्याने आ. अमोल मिटकरी याचे विरुद्ध हिंदु सेवा सहाय्य समितीचे नरेंद्र पाटील यांनी दखलपात्र गुन्ह्याची कायदेशीर फिर्याद २४ एप्रिल रोजी नंदुरबार शहर पोलीस ठाण्यात दाखल केली.
