नंदूरबार l प्रतिनिधी
प्रकाशा-नंदुरबार रस्त्यावरील कोरीट फाट्याजवळ कार-दुचाकीमध्ये धडक झाल्याने घडलेल्या अपघातात बोरद प्राथमिक आरोग्य केंद्रातील कर्मचारी ठार झाल्याची घटना घडली आहे. याप्रकरणी पोलिसात उशिरापर्यंत गुन्हा दाखल करणे सुरू होते.
याबाबत सूत्रांनी दिलेल्या माहितीनूसार, काल दि.२६ मार्च रोजी सायंकाळी ५.३० वाजेच्या सुमारास तळोदा तालुक्यातील बोरद येथील प्राथमिक आरोग्य केंद्रात कार्यरत किरण अशोक जोगी( वय ४०) हे त्यांच्या दुचाकीने (क्र.एम.एच.३९ के ४९५२) नंदुरबारकडे जात होते. यावेळी नंदुरबारकडून प्रकाशाकडे जाणारी चारचाकी वाहन (क्र.जी.जे.११ एबी ८१२०) व दुचाकी यामध्ये धडक झाली. घडलेल्या अपघातात किरण जोगी यांना गंभीर दुखापत झाल्याने त्यांचा मृत्यू झाला आहे. दोन्ही वाहनांमधील धडक जोरदार असल्याने दुचाकीचे तसेच चारचाकीचेही पुढचे चाक निखळले आहे. दरम्यान, वाहन चालक हे राजकोट येथील असल्याचे समजले. काल दि. २६ मार्च रोजी रात्री उशिरापर्यंत याबाबत तालुका पोलिस ठाण्यात नोंद करण्याची प्रक्रिया सुरु होती. घटनास्थळी प्रकाशा पोलिस दूरक्षेत्राच्या पोलिस कर्मचाऱ्यांनी भेट दिली.
