नंदुरबार l प्रतिनिधी
मधुमक्षिका पालनासाठी जिल्ह्यात अनुकूल वातावरण असून मधमाशी संवर्धनासाठी सर्वांनी प्रयत्न करणे आवश्यक असल्याचे प्रतिपादन सहयोगी अधिष्ठाता,कृषी महाविद्यालय, नंदुरबार डॉ. खरबडे यांनी केले.
कृषी विज्ञान केंद्रात आयोजित केलेल्या व राष्ट्रीय बी बोर्ड आणि कृषी सहयोग व किसान कल्याण विभाग, भारत सरकार यांनी प्रायोजित केलेल्या ७ दिवसीय शास्त्रीय मधुमक्षिका पालन या प्रशिक्षणाच्या समारोपप्रसंगी ते बोलत होते. यावेळी ललित पाठक, आर.एस.दहातोंडे, पी.सी.कुंदे आदी मान्यवर उपस्थित होते. यावेळी प्रास्ताविक करतांना वरिष्ठ शास्त्रज्ञ तथा प्रमुख, कृषी विज्ञान केंद्र,आर.एस.दहातोंडे यांनी मधुमक्षिका पालनातील शास्रीय बारकावे समजून हा व्यवसाय केल्यास नक्की यश मिळेल असा विश्वास व्यक्त केला. जेष्ठ सल्लागार,डॉ.हेडगेवार सेवा समितिचे ललित पाठक यांनी मधुमक्षिका पालन हा नमुनेदार व्यवसाय असून मधमाशी शेतीच्या उत्पादन वाढीसाठी आवशक असल्याचे सांगितले. कृषी विज्ञान केंद्राचे पीक संरक्षण तज्ञ पद्माकर कुंदे, यांनी या सात दिवसीय प्रशिक्षणादरम्यान मधमाशीच्या जाती, मधमाशीचे परागी भवनातील महत्व, जीवनक्रम, मधपेटी रचना, मधुबन लावणे, मध उत्पादने, मधमाशी रोग व शत्रू व्यवस्थापन आदी बाबत सह प्रात्यक्षिक मार्गदर्शन केले. प्रशिक्षणात करमसिंग वसावे, यांनी महाराष्ट्र राज्य खादी ग्रामोद्योग मंडळाच्या योजनांची माहिती दिली.