नंदुरबार l प्रतिनिधी-
हिंदू जनजागृती समितीच्या वतीने हनुमान जयंती निमित्त श्री मोठा मारुती मंदिर येथे शौर्य, सामर्थ्य आणि धर्मरक्षणाचे प्रतीक असलेल्या भगवान हनुमंताच्या गदेचे पूजन भक्तीमय वातावरणात संपन्न झाले.
हिंदू धर्मात गदा हे केवळ एक शस्त्र नसून ती पराक्रम, अन्यायाविरुद्ध लढण्याची वृत्ती आणि धर्माचे रक्षण करण्याची शक्ती यांचे प्रतीक मानली जाते. भगवान हनुमानांच्या हातातील गदा ही त्यांच्या अद्वितीय बलशक्तीचे तसेच भक्ती आणि निष्ठेचे प्रतीक आहे. गदेचे पूजन केल्याने धैर्य, आत्मविश्वास आणि संकटांशी सामना करण्याची शक्ती प्राप्त होते, असा धार्मिक समज आहे.
या पूजन सोहळ्यावेळी नंदुरबार शहराचे पोलीस निरीक्षक निलेश देसले तसेच उपनिरीक्षक श्री. प्रशांत जाधव, श्री मोठा मारुती मंदिराचे कार्याध्यक्ष अशोक चौधरी, सचिव कल्याण पाटील, हिंदू सेवा सहाय्य समितीचे नरेंद्र पाटील व प्रशांत चौधरी यांच्या हस्ते विधीपूर्वक गदा पूजन करण्यात आले.
यावेळी विलास महाराज यांनी मंत्रोच्चार करून विधिवत पूजा पार पाडली. कार्यक्रमाला हिंदू बांधव मोठ्या संख्येने उपस्थित होते. संपूर्ण परिसर भक्तीमय व उत्साहपूर्ण वातावरणाने भारावून गेला होता. या कार्यक्रमाच्या यशस्वीतेसाठी मयूर चौधरी, हर्षल देसाई, भारती पंडित व आशा वाडीले यांनी परिश्रम घेतले
या उपक्रमामुळे समाजात शौर्य, एकता आणि धर्मभावना वृद्धिंगत होण्यास मदत होईल, असा विश्वास उपस्थितांनी व्यक्त केला.
