नंदुरबार l प्रतिनिधी-
नवापूर तालुक्यातील गंगापूर परिसरात ५५ वर्षीय महिलेवर अमानुषपणे लैंगिक अत्याचार करून तिची हत्या केल्याची घटना उघडकीस आली आहे. या प्रकरणातील संशयिताला अवघ्या १२ तासांत अटक करण्यात पोलिसांना यश आले असून, स्थानिक गुन्हे शाखा व विसरवाडी पोलीस ठाण्याच्या पथकाने ही उल्लेखनीय कामगिरी बजावली आहे.
दि. २४/०२/२०२६ रोजी सायंकाळच्या सुमारास गंगापूर ते नानगीपाडा रस्त्यालगत असलेल्या शेतात सदर महिला गंभीर जखमी अवस्थेत आढळून आली. अज्ञात व्यक्तीने तिच्यावर लैंगिक अत्याचार करून अमानुष मारहाण केल्याने ती गंभीर जखमी झाली होती. नातेवाईक व स्थानिक नागरिकांनी तत्काळ तिला रुग्णालयात दाखल केले; मात्र वैद्यकीय अधिकाऱ्यांनी तपासणीनंतर तिला मृत घोषित केले.
या घटनेप्रकरणी विसरवाडी पोलीस ठाणे येथे गुन्हा दाखल करण्यात आला होता. पोलिसांची शिताफी
फिर्याद व प्राथमिक तपासात गंगापूर येथील मनिल छगन नाईक ऊर्फ टायबू (वय २३) याने हा गुन्हा केल्याचे निष्पन्न झाले. घटना घडल्यानंतर आरोपी गावातून फरार झाला होता.
प्रकरणाचे गांभीर्य लक्षात घेऊन नंदुरबार जिल्हा पोलीस अधीक्षक श्रवण दत्त (भा.पो.से.) यांनी स्थानिक गुन्हे शाखेला तात्काळ कारवाईचे आदेश दिले. पोलीस निरीक्षक हेमंत पाटील यांच्या मार्गदर्शनाखाली पथकाने आरोपीचा शोध सुरू केला.
गुप्त बातमीदाराकडून मिळालेल्या माहितीनुसार आरोपी चिंचपाडा रेल्वे स्थानक परिसरात पळून जाण्याच्या तयारीत असल्याचे समजले. त्यानुसार पोलिसांनी सापळा रचत नवापूर रेल्वे स्थानक परिसरातून आरोपीस शिताफीने ताब्यात घेतले व सखोल चौकशीनंतर अटक केली.
वरिष्ठांच्या मार्गदर्शनाखाली कारवाई
ही कारवाई पोलीस अधीक्षक श्रवण दत्त, अपर पोलीस अधीक्षक आशित कांबळे व उपविभागीय पोलीस अधिकारी संजय महाजन यांच्या मार्गदर्शनाखाली पार पडली. स्थानिक गुन्हे शाखा व विसरवाडी पोलीस ठाण्याच्या अधिकारी-कर्मचाऱ्यांनी संयुक्तपणे ही धाडसी कारवाई यशस्वी केली.
परिसरात संतापाची लाट
घटनेमुळे गंगापूर व परिसरात तीव्र संताप व्यक्त होत असून, आरोपीस कठोर शिक्षा व्हावी अशी मागणी नागरिकांकडून होत आहे. पोलिसांनी पुढील तपास वेगाने सुरू ठेवला आहे.
