भालेर येथे मातृ-पितृ पूजन दिवस उत्साहात; संस्कार आणि कृतज्ञतेचा त्रिवेणी संगम

नंदुरबार l प्रतिनिधी-

पालकांचा सन्मान आणि कुटुंबव्यवस्थेचे महत्त्व जपणे ही काळाची गरज आहे. मातृ-पितृ चरणी नतमस्तक होणे म्हणजेच जीवनातील यशाचा खरा पाया मजबूत करणे होय असे प्रतिपादन संस्थेचे अध्यक्ष भास्करराव पाटील यांनी केले.

भालेर येथील का. वि. प्र. सं. संचलित श्रीमती क. पु. पाटील माध्यमिक विद्यालय व कनिष्ठ महाविद्यालय आणि द फ्युचर स्टेप इंग्लिश मीडियम स्कूल यांच्या संयुक्त विद्यमाने १४ फेब्रुवारी रोजी ‘मातृ-पितृ पूजन दिवस’ अत्यंत भावपूर्ण वातावरणात साजरा करण्यात आला.

संस्कारांचा आदर्श वस्तुपाठ
कार्यक्रमाची सुरुवात अतिशय प्रेरणादायी पद्धतीने झाली. मुख्याध्यापक पी. एस. सूर्यवंशी व पर्यवेक्षक पी. डी. पाटील यांनी स्वतःच्या वडिलांचे विधिवत चरणप्रक्षालन करून पूजन केले. या कृतीतून त्यांनी विद्यार्थ्यांसमोर संस्कारांचा जिवंत आदर्श उभा केला. त्यानंतर शेकडो विद्यार्थ्यांनी आपल्या माता-पित्यांचे पूजन करून त्यांचे आशीर्वाद घेतले. यावेळी संपूर्ण परिसर “आई-वडील हेच खरे दैवत” या भावनेने भारावून गेला होता.
कार्यक्रमाच्या अध्यक्षस्थानी संस्थेचे संस्थापक अध्यक्ष भास्करराव हिरामण पाटील होते. प्रमुख पाहुणे म्हणून माजी सरपंच बेबीताई पाटील, देविदास पाटील, शरदराव सूर्यवंशी, शहाणाभाऊ धनगर, भालेरच्या सरपंच कविता पाटील
यांची विशेष उपस्थिती होती. तसेच शिंदगव्हाण, भालेर, नगाव, तिसी, निंभेल, काकरदे या परिसरातील पालक मोठ्या संख्येने उपस्थित होते.

भावनिक सादरीकरण
विद्यार्थ्यांनी आई-वडिलांवरील अभंग, भावगीते आणि काव्यपंक्ती सादर केल्या. पालकांच्या त्यागाबद्दल कृतज्ञता व्यक्त करताना अनेक विद्यार्थ्यांचे कंठ दाटून आले, तर मुलांच्या प्रेमळ कृतीने पालकांच्या डोळ्यांत आनंदाश्रू उभे राहिले.
हेमंत नामदेव माळी, भूषण हिम्मत पाटील, विजय प्रकाश सोनवणे यांच्यासह सौ. भिकूबाई भिल, सुवर्णा पाटील, भारती पाटील, संगीता पाटील, मनीषा पाटील यांसह अनेक माता-पालक भगिनींनी या सोहळ्यात सहभाग नोंदवला.
प्रास्ताविक सी. व्ही. पाटील यांनी तर सूत्रसंचालन व्ही. इशी यांनी केले. मुख्याध्यापक पी. एस. सूर्यवंशी व पर्यवेक्षक पी. डी. पाटील यांच्या मार्गदर्शनाखाली सर्व शिक्षक व शिक्षकेतर कर्मचाऱ्यांनी कार्यक्रमाच्या यशस्वीतेसाठी परिश्रम घेतले.