नंदुरबार l प्रतिनिधी
नगरपालिकेचा माध्यमातून शहरात साकारण्यात येत असलेल्या ‘नमो उद्याना’चे नामकरण आता ‘लोकनेते अजितदादा पवार नमो उद्यान’ असे करण्यात आले आहे. राज्याचे माजी उपमुख्यमंत्री अजित पवार यांच्या अकाली निधनानंतर त्यांना आगळीवेगळी श्रद्धांजली वाहण्यासाठी नगरपरिषदेने हा महत्त्वपूर्ण निर्णय घेतल्याची माहिती नगराध्यक्षा सौ.रत्ना रघुवंशी यांनी दिली.
नंदुरबार नगरपालिकेतर्फे शहराच्या सौंदर्यीकरणात भर टाकण्यासाठी शहरातील ज्ञानदीप सोसायटी परिसरात ‘नमो उद्यान’ या भव्य उद्यानाची निर्मिती केली जात आहे. उद्यानाचे भूमिपूजन २६ जानेवारी रोजी राज्याचे गृहराज्यमंत्री योगेश कदम यांच्या हस्ते मोठ्या उत्साहात पार पडले होते. प्रारंभी या प्रकल्पाचे नाव ‘नमो उद्यान’ असे होते.
मात्र, राज्याचे लाडके नेतृत्व आणि उपमुख्यमंत्री अजित पवार यांच्या अचानक झालेल्या निधनाने संपूर्ण राज्यासह नंदुरबार जिल्ह्यावरही शोककळा पसरली आहे. त्यांच्या कार्याचा गौरव करण्यासाठी आणि त्यांच्या स्मृती जतन करण्यासाठी नंदुरबार नगर परिषदेने या उद्यानाचे नाव ‘लोकनेते अजितदादा पवार नमो उद्यान’ करण्याचा ठराव करण्यात येणार आहे.
लोकनेते अजितदादांचे राज्याच्या विकासात मोठे योगदान होते. त्यांना श्रद्धांजली अर्पण करण्यासाठी नगरपालिकेने हा निर्णय घेतला असून, हे उद्यान शहराच्या वैभवात भर टाकण्यासोबतच दादांच्या आठवणींना उजाळा देणारे ठरेल.
सौ.रत्ना रघुवंशी, नगराध्यक्ष
