नंदुरबार l प्रतिनिधी
तीन राज्यातून चोरलेल्या 7 दुचाकी जप्त करण्यात आल्या असून याप्रकरणी एकास अटक करण्यात आली आहे.सदरची कारवाई स्थानिक गुन्हे अन्वेषण शाखेने केली.
धडगाव पोलीस ठाणे हद्दीतील रहिवासी दिनेश जांग्या पावरा यांची बजाज कंपनीची मोटर सायकल ही शहादा येथुन चोरी झाल्याबाबतची फिर्यादवरुन शहादा पोलीस ठाण्यात भा.द.वि. कलम 379 प्रमाणे गुन्हा दाखल करण्यात आला होता, त्याअनुषंगाने स्थानिक गुन्हे शाखेकडुन समांतर तपास सुरू असतांना स्था.गु.शा. पोलीस निरीक्षक किरणकुमार खेडकर यांना गुप्त बातमी मिळाली की, वरील गुन्हयातील चोरीस गेलेली मोटार सायकल ही चांदसेली ता. शहादा येथे राहणा-या एका इसमाकडे असुन तो सदर वाहन वापरत आहे, अशी खात्रीशीर माहिती मिळाल्यावरुन पोलीस अधीक्षक श्रवण दत्त.एस यांचे मार्गदर्शनाखाली स्था.गु.शा. पोलीस निरीक्षक किरणकुमार खेडकर यांनी लागलीच एक पथक तयार करुन मिळालेल्या बातमीच्या ठिकाणी रवाना केले. स्थानिक गुन्हे शाखेचे पथकाने मिळालेले बातमीचे अनुषंगाने चांदसैली गाव परिसरात जाऊन खात्री केली असता,
एक इसम वरील वर्णनाप्रमाणे विना क्रमांकाचे दुचाकी वाहनासह मिळून आला. त्यास ताब्यात घेऊन चौकशी केली असता त्याने त्याचे नाव पुरूषोत्तम ऊर्फ सत्यम संतोष सुळे, रा. चांदसैली ता. शहादा जि. नंदुरबार असे सांगितले. त्याच्या ताब्यात मिळून आलेल्या मोटारसायकलचे कागदपत्रांबाबत विचारपूस करता तो उडवाउडवीची उत्तरे देऊ लागला त्यास विश्वासात घेऊन अधिक विचारपूस करता त्याने सदरची मोटारसायकल ही त्याचा साथीदार सागर छगन सोनवणे रा.चिरखान ता. शहादा यांच्यासह शहादा शहरातुन चोरी केली असल्याचे सांगितले. सदर इसमास अधिक खोलात जाऊन विचारपुस करता त्याने त्याचे साथीदार सागर छगन सोनवणे, रा. चिरखान ता. शहादा, योगेश कांतीलाल पावरा, रा. चांदसैली ता. शहादा यांच्यासह नाशिक, मध्यप्रदेश व गुजरात राज्यातुन देखील अजुन काही मोटारसाकली चोरी केले असल्याचे सांगितले. सदर इसमाचे दोनही साथीदारांना स्थानिक गुन्हे शाखेचे पथकाने लागलीच ताब्यात घेऊन सदर आरोपींकडुन चोरी करुन आणलेल्या मोटारसायकली कुठे आहेत बाबत विचारता, त्या चांदसैली गावाचे एका झोपडीमागे लपवून ठेवले असल्याची त्यांनी सविस्तर माहिती दिली. त्यावरुन स्थानिक गुन्हे शाखेचे पथकाने सदर इसमांना ताब्यात घेऊन त्यांनी दिलेल्या माहितीचे आधारे नमुद ठिकाणी जाऊन तपासणी केली असता तेथे देखील काही मोटारसायकली मिळून आल्या आहेत.
वरील नमुद इसमांकडुन स्थानिक गुन्हे शाखेला एकुण 6 लाख 54 हजार. किमतीच्या एकूण 7 मोटारसायकली हस्तगत करण्यात यश मिळाले आहे. सदरची कामगिरी नंदुरबार जिल्ह्याचे पोलीस अधीक्षक श्रवण दत्त. एस, अपर पोलीस अधीक्षक आशित कांबळे, यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, पोना विकास कापूरे, पोना पुरूषोत्तम सोनार, पोना मोहन ढमढेरे, पोकॉ विजय ढीवरे, पोकों यशोदीप ओगले यांनी केली आहे.
