नंदुरबार l प्रतिनिधी-
धडगांव पोलीस ठाणे हद्दीतील कुकलट वरचापाडा शिवारात कापसाच्या शेतीआड केली जाणारी गांजाशेती नंदुरबार एलसीबीच्या पथकाने उध्वस्त केली असून केली असून सुमारे पाच लाखांचा मुद्देमाल हस्तगत करण्यात आला आहे.याप्रकरणी दोघा संशयितांविरुध्द गुन्हा दाखल करण्यात आला आहे.
कुकलट वरचापाडा शिवारात दोन इसमांनी कापसाचे शेतात स्वत:च्या आर्थिक फायद्यासाठी बेकायदेशीररित्या मानवी मेंदुवर विपरीत परीणाम करणाऱ्या गुंगीकारक ओल्या गांजाची बेकायदेशीररित्या लागवड करुन त्याची जोपासना करीत आहे, अशी गोपनीय माहिती मिळाल्याने पोलीस अधीक्षक श्रवण दत्त एस. यांनी स्थानिक गुन्हे शाखा व धडगांव पोलीसांचे एक पथक तयार करुन कारवाई करण्याची सुचना केली.
त्याप्रमाणे स्थानिक गुन्हे शाखा व धडगांव पोलीसांचे पथक मिळालेल्या गोपनीय बातमीप्रमाणे धडगांव पोलीस ठाणे हद्दीतील कुकलट ते कात्रा रोडवर एका कापसाचे शेताजवळ आले. शेताच्या बांधावर दोन इसम हालचाल करत असल्याचे दिसुन आले. पोलीस पथक त्यांचे दिशेने येत असल्याचे लक्षात येताच शेताच्या बांधावर उभ्या असलेल्या दोन्ही इसमांनी तेथून पळ काढला. सदर ठिकाणी पोलीस पथकाने शेताची पाहणी केली असता शेतात आतील बाजुस हिरवट रंगाचे गांजा सदृश्य झाडांची लागवड केलेली असल्याचे दिसुन आले.
पथकांनी संपुर्ण शेत पिंजुन काढले असता तेथे संपूर्ण शेतातून ५० किलो २ ग्रॅम वजनाचे एकुण ५ लाख २०० रुपये किंमतीची गांजाची झाडे मिळुन आली. सदर गांजाची झाडे गुन्ह्याच्या पुढील तपासकामी योग्य ती सर्व कायदेशीर प्रक्रिया करुन ताब्यात घेण्यात आली.
तसेच बेकायदेशीररित्या गांजा सदृष्य झाडांची लागवड करुन संवर्धन व जोपासना करतांना सायका ऊर्फ सायसिंग ठुमला पावरा, थिक्या ऊर्फ गोमा ठुमला पावरा (दोन्ही रा.कुकलट वरचापाडा ता.धडगांव) यांचेविरुद् धडगांव पोलीस ठाण्यात गुन्हा दाखल करण्यात आला आहे. सदरची कामगिरी पोलीस अधीक्षक श्रवण दत्त एस, अपर पोलीस अधीक्षक आशित कांबळे, शहादा विभागाचे उप विभागीय पोलीस अधिकारी दत्ता पवार यांचे मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, धडगांव पोलीस ठाण्याचे पोलीस निरीक्षक राजेंद्र जगताप, स्थानिक गुन्हे शाखेचे पोलीस उप निरीक्षक मुकेश पवार, पोलीस हवालदार राकेश वसावे, विशाल नागरे, सुनिल पाडवी, बापु बागुल, पोलीस नाईक पुरुषोत्तम सोनार, विकास कापुरे, पोलीस अंमलदार विजय ढिवरे, दीपक न्हावी, यशोदीप ओगले, अभिमन्यु गावीत तसेच धडगांव पोलीस ठाण्याचे पोलीस हवालदार स्वप्निल गोसावी, पोलीस अंमलदार विनोद पाटील, प्रतापसिंग गिरासे यांनी केली आहे.
