नंदुरबार l प्रतिनिधी-
जिल्ह्यातील सर्व शेतकऱ्यांनी “ई-पीक पाहणी” या मोबाईल अॅपचा वापर करुन पीक पाहणी 15 सप्टेंबर 2024 पर्यंत नोंदवावी, असे आवाहन अपर जिल्हाधिकारी धनंजय गोगटे यांनी एका शासकीय प्रसिद्धी पत्रकान्वये केले आहे.
राज्यातील सर्व तालुक्यात ई- पीक पाहणी प्रणालीद्वारे पीक पाहणी करण्याची योजना राबविण्यात येत असून शेतकरी स्वतः ‘ई- पीक पाहणी व्हर्जन-2’ या मोबाईल अॅपद्वारे आपल्या शेताची पीकाची पीक पाहणी गाव नमुना 7/12 उताऱ्यावर नोंदवावी. “माझी शेती, माझा सातबारा, मीच नोंदविणार माझा पीक पेरा” शासनाच्या या संकल्पनेनुसार शेतकऱ्यांना आपल्या शेताची पीक पाहणी करण्याची सुविधा उपलब्ध करण्यात आली आहे.
खरीप हंगाम-2024 साठी ई-पीक पाहणी कार्यक्रम संपूर्ण राज्यात सुरु असून 15 सप्टेंबर 2024 पर्यंत ई-पीक पाहणी नोंदविता येईल. मोबाईल अॅपद्वारे शेतकऱ्यांनी पीक पाहणी नोंदविल्यास त्याचा फायदा अचुक पीक पाहणी नोंदणी व विहीत शासकीय योजनेचा लाभ यासाठी होणार आहे. ई-पीक पाहणी नोंदविण्यासाठी काही अडचण आल्यास संबंधित तलाठी, मंडळ अधिकारी व तहसिल कार्यालय येथे संपर्क साधावा, असेही अपर जिल्हाधिकारी श्री. गोगटे यांनी शासकीय प्रसिद्धी पत्रकान्वये कळविले आहे.
