नंदुरबार l प्रतिनिधी
नाशिक शिक्षक मतदार संघाच्या निवडणूक पूर्व संध्येला नंदुरबारात आचारसंहीता पथकाला मतदारांना प्रभावित करण्यासाठी पैसे जवळ बाळगतांना कन्यादान मंगल कार्यालया जवळील एका घरात मिळून आले. पथकाने दोन लाख 20 हजाराची रोकड जप्त केली असून याप्रकरणी आठ जणांविरुद्ध उपनगर पोलिस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनुसार, नाशिक शिक्षक मतदार संघासाठी आज मतदान होत आहे.नंदुरबार शहरातील कन्यादान मंगल कार्यालयात जवळील एका घरातील पहिल्या मजल्यावर पैशाचे पाकिटे तयार करण्यात येत असल्याची माहिती आचार संहिता पथकाला मिळाली. त्या माहितीच्या अनुषंगाने स्थानिक गुन्हे अन्वेषण शाखा, उपनगर पोलीस, महसूल विभाग, भरारी पथकाने नळवा रोड परिसरातील रूपम नगर येथील एका घराच्या दुसऱ्या मजल्यावर धाड टाकली. आचारसंहीता पथकाने दोन लाख २० हजार रुपयांची रोकड जप्त केली. नाशिक विभाग शिक्षक मतदार संघातील उमेदवार विवेक कोल्हे यांना मतदारांनी मतदान करावे या उद्देशाने मतदारांना प्रभावित करण्यासाठी पैसे जवळ बाळगतांना मिळून आले. पाच हजार रुपयांचे ४४ पाकीटे आचारसंहिता पथकाने जप्त केली.
मंडळ अधिकारी बळीराम चाटे यांच्या फिर्यादीवरुन नंदुरबार उपनगर पोलिस ठाण्यात बाळासाहेब भानुदास चौधरी (रा. धरणगाव, ता. कोपरगाव), कृष्णा रमेश चव्हाण (रा. कोपरगाव), गणपत दवंगे (रा. कोपरगाव), सोमनाथ गोन (रा. कोपरगाव), सोमनाथ रामभाऊ गावडे (रा.शिंगणापूर), गोरख किसन बडाख (रा.शिंगणापूर, ता. कोपरगाव), रामकृष्ण मुरलीधर मोरे (रा. नाटेगाव, ता. कोपरगाव) यांच्याविरुद्ध भादंवि कलम १९६० चे कलम १७१ (ब), १७१ (एच), ३४ सह लोकप्रतिनिधी कायदा १९५१ चे कलम १२३ (१) प्रमाणे गुन्हा दाखल करण्यात आला असून पुढील तपास पोलिस निरीक्षक श्याम निकम करीत आहेत.