नंदुरबार l प्रतिनिधी
लोकसभा मतदार संघासाठी शेवटच्या दिवसा अखेर 18 जणांनी नामांकन दाखल केले दरम्यान शेवटच्या दिवशी इच्छुकांसह त्यांच्या समर्थकांनी जिल्हाधिकारी कार्यालयाच्या परिसरात गर्दी केल्याने यात्रेचे स्वरुप आले होते. काल अखेरच्या दिवशी दिवसभरात ११ इच्छूकांनी नामांकन दाखल केले. नंदुरबार लोकसभा मतदार संघासाठी एकूण १८ जणांनी नामांकन दाखल केले असून आज दि.२६ रोजी छाननी करण्यात येणार आहे.
नंदुरबार लोकसभा मतदार संघासाठी दि.१८ ते २५ एप्रिल या कालावधीत नामांकन दाखल करण्याची प्रक्रिया सुरु होती. या कालावधीत एकूण १८ इच्छूकांनी नामांकन दाखल केले आहेत. काल अखेरच्या दिवशी दिवसभरात ११ नामांकने दाखल झाली. यामध्ये भारतीय राष्ट्रीय कॉँग्रेसचे ॲड. गोवाल कागडा पाडवी यांनी शहरातून रॅली काढत निवडणूक निर्णय अधिकाऱ्यांकडे नामांकन दाखल केले.
तसेच हेमलता कागडा पाडवी यांनीही भारतीय राष्ट्रीय कॉँग्रेसतर्फे नामांकन दाखल केले आहे. तर ॲड.के.सी.पाडवी यांनी अपक्ष नामांकन दाखल केले आहे. बहुजन मुक्ती पार्टीतर्फे रोहिदास गेमजी वळवी, भारत आदिवासी पार्टीतर्फे रविंद्र रणजित वळवी, बहुजन समाज पक्षातर्फे आनंद सुकलाल कोळी, वंचित बहुजन आघाडीतर्फे हेमंत मन्साराम कोळी यांनी नामांकने दाखल केली आहेत. तसेच सुशिलकुमार जहॉँगिर पावरा, जालमसिंग सुतुम पवार, अलिबाबा रशिद तडवी व मोठाजी तुकाराम ठाकरे यांनी काल अपक्ष नामांकने दाखल केली आहेत.
तर यापूर्वीच भाजपातर्फे डॉ.हीना गावित, डॉ.सुप्रिया गावित यांनी नामांकन दाखल केले आहे. तसेच अपक्ष गोपाल सुरेश भंडारी यांनी तर पिपल्स पार्टी ऑफ इंडियातर्फे निर्मला वसावे यांच्यासह दीपककुमार मधुकर शिरसाठ, गितांजली शशिकांत कोळी, डोंगर जिभाऊ महिरम यांनी नामांकन दाखल केले. नंदुरबार लोकसभा मतदार संघासाठी एकूण १८ इच्छूकांनी नामांकने दाखल केली आहेत. आज दि.२६ रोजी छाननी प्रक्रिया पार पडणार आहे. तर दि.२९ रोजी माघारीची अंतिम मुदत असणार आहे. यामुळे १८ इच्छुकांनी नामांकने दाखल केली असली तरी प्रत्यक्षात रिंगणातील उमेदवार दि.२९ रोजी माघारीनंतरच समजणार आहेत. यामुळे आता माघारीकडे लक्ष लागले असून नेमके कोण माघार घेणार? याची चर्चा सुरु आहे.