नंदूरबार l प्रतिनिधी
झोपडीत राहणाऱ्या बालिकेचा विनयभंग करणाऱ्या आरोपीस न्यायालयाने 4 वर्षे कारावासाची शिक्षा ठोठावली असून 21 हजार रुपयांचा दंड देण्यात आला आहे.
अधिक माहिती अशी की, सारंगखेडा पोलीस ठाणे हद्दीतील कोठली शिवारातील शेतात मजुरीसाठी गेलेल्या 15 वर्षीय पिडीत फिर्यादी बालिका हिचा आरोपी यानी पाठलाग करुन, तिचे अज्ञान असल्याचा गैरफायदा घेऊन, पिडीत ही कामानिमित्ताने बाहेर असल्याची संधी साधून पिडीत बालिकेला आरोपीने मागुन येऊन वाईट काम करण्याचे उद्देशाने जोरात पकडून तिचे मनास लज्जा उत्पन्न होईल असे कृत्य केले, व त्याच्या साथीदारांसह पिडीत फिर्यादी हिचे झोपडीत अनाधिकारे प्रवेश करुन, पिडीतेचे आई व भावंडांना शिवीगाळ करुन दहशत निर्माण केल्याप्रकरणी, सारंगखेडा पोलीस ठाण्यात भा. द. वि.क. 354 (अ), (ब), (ड), 450, 504, 427, 34 सह बालकांचे लैंगिक अपराधापासून संरक्षण अधिनियम 2012 चे कलम 7, 8, 11 (4) व 12 प्रमाणे गुन्हयातील तिनही आरोपींविरुद्ध गुन्हा नोंदविला होता.
सदरचा गुन्हा गंभीर स्वरुपाचा असल्याने गुन्ह्यातील आरोपी यांना तात्काळ अटक करण्यात आली होती. सारंगखेडा पोलीस ठाण्याचे तत्कालीन प्रभारी सहा. पोलीस निरीक्षक मनोहर पगार यांनी सदरचा गुन्ह्याचा तपास त्यांचे स्वतःकडे घेतला. सपोनि मनोहर पगार व त्यांचे सहकारी पोलीस यांनी सदर गुन्ह्याचा अत्यंत शास्त्रोक्त पद्भुतीने तपास करीत महत्वाचे पुरावे जमा केले होते. तसेच गुन्हा दाखल झाल्यानंतर आरोपी याचे विरुद्ध मुदतीत दोषारोपपत्र सत्र न्यायाधीश-1, नंदुरबार यांच्या न्यायालयात सादर केले होते. सदर खटल्याची सुनावणी अति. जिल्हा व सत्र न्यायाधीश 1, सी. एस. दातीर, नंदुरबार यांच्या समक्ष झाली.
सदर खटल्यामध्ये सरकार पक्षाचे वतीने साक्षीदार तपासण्यात आले. त्यात पिडीत बालिका वय 15 वर्षे, प्रत्यक्षदर्शी साक्षीदार, पिडीत बालिकेचे पालक, वैद्यकीय अधिकारी, पंच व तपास अधिकारी यांच्या साक्ष महत्वाच्या ठरल्या आहेत. यावरुन आरोपींविरुद्ध गुन्हा सिद्ध झाल्याने अति. जिल्हा व सत्र न्यायाधीश 1, नंदुरबार यांनी गुन्हयातील आरोपी क्रमांक 1 यास 4 वर्ष कारावास व रुपये 6,000 रु. दंडाची शिक्षा व त्याचे दोन्ही साथीदार आरोपींना 1 वर्ष कारावास व रुपये 15,000 रु. दंडाची शिक्षा ठोठावली आहे.
सदर खटल्याचे कामकाज सरकारी पक्षाचे वतीने अति. सरकारी अभियोक्ता ॲड. वाय.बी.मोरे यांनी काम यांनी पाहिले होते. तसेच पैरवी अधिकारी पोउपनि राहुल भदाणे, पैरवी अंमलदार पोहेकॉ 124 परशुराम कोकणी व पोशि 1177 देविदास सुर्यवंशी, पोकॉ 495 अविनाश बिरारे यांनी कामकाज पाहीले आहे. तपास अधिकारी व त्यांचे पथक तसेच अति. सरकारी अभियोक्ता यांचे नंदुरबार जिल्ह्याचे पोलीस अधीक्षक श्रवण दत्त. एस, अपर पोलीस अधीक्षक निलेश तांबे, शहादा विभागाचे उप विभागीय पोलीस अधिकारी दत्ता पवार यांनी अभिनंदन केले आहे.
