नंदुरबार | प्रतिनिधी-
मध्यप्रदेश राज्यातून विदेशी बिअरचे ४४५ खोके अवैधरित्या विक्रीसाठी गुजरात राज्यात जाणार्‍या ट्रकला विसरवाडी पोलीसांनी मार्गावर पकडले. यावेळी १८ लाखाची दारू व ट्रक पोलिसांनी जप्त केली आहे. याप्रकरणी दोघांना अटक करण्यात आली आहे.
याबाबत पोलीस सुत्रांनी दिलेल्या माहितीनुसार, मध्यप्रदेशातून गुजरात राज्यात विदेशी बिअर विना परवाना वाहतूक होत असल्याची माहिती पोलीस अधीक्षक महेंद्र पंडीत यांना गुप्त बातमीदार मिळाली. त्यानुसार त्यांनी विसरवाडीचे सपोनि नितीन पाटील यांना सुचना केल्या. त्यांनी पथकासह नागपूर-सुरत महामार्गावर महालक्ष्मी हॉटेल समोर रस्त्यावर नाकाबंदी केली. रात्री ११.३० वाजेच्या सुमारास विदेशी बिअर भरुन वाहतूक करणार्‍या मालट्रक पोलीसांनी अडवला. ट्रकचालकाने मालट्रकमध्ये मका असल्याचे सांगितले. मात्र, पोलीसांनी ताडपत्री उघडुन पाहिले असता त्यात मका गोणीचे थर आढळून आले. त्या गोणीच्या खाली विदेशी बिअरचे खोके आढळून आले एका खोक्यातून बिअरची बाटली काढुन पाहिली असता त्यावर पॉवर १०००० सुपर स्टॉंग बियर फॉर सेल इन मध्यप्रदेश ओन्ली असे लिहिले होते. पोलीसांनी बिअरच्या परमिटबाबत विचारपूस केली असता त्यांच्याकडे बिअरचे कोणतेही परमिट किंवा दारुची वाहतुकीचा परवाना नसल्याचे चालकाने सांगितले. त्यामुळे सदर दारु ही फक्त मध्यप्रदेश राज्यात विक्रीसाठी असल्याने ती गैरकायदा विनापास परवाना गुजरात राज्याकडे विक्रीसाठी घेवून जात असल्याचे पंच व पोलीसांची खात्री झाल्याने हा मालट्रक विसरवाडी पोलीस ठाण्यातआवारात जमा करण्यात आला. ट्रकमधील १८ लाख १ हजार रुपये किंमतीचे पॉवर १०००० सुपर स्टॉंग बियरचे एकुण ४४५ खोके , व टाटा कंपनीचा मालट्रक (क्र.एम.एच- १९,सी.वाय-२४०३) असा मुद्देमाल जप्त करण्यात आला. सहाय्यक पोलीस उपनिरीक्षक दिलीप मोल्या गावीत यांच्या फिर्यादीवरुन विसरवाडी पोलीस ठाण्यात चालक रामकृष्ण पंडीत पाटील रा.वराड ता.धरणगांव, सुनिल श्रीराम पाटील रा.बोराडी ता.शिरपुर यांच्याविरूध्द महाराष्ट्र दारुबंदी अधिनियम कलम ६५ (ई),(क) स ८३, १०८ प्रमाणे गुन्हा दाखल करण्यात आला आहे. ही कारवाई पोलीस अधीक्षक महेंद्र पंडीत, अपर पोलीस अधिक्षक विजय पवार, उपविभागीय पोलीस अधिकारी सचिन हिरे यांच्या मार्गदर्शाखाली सपोनि नितीन पाटील, असई दिलीप गावीत, पोकॉ मुकेश सावळे, विशाल गावीत, नितीन सोनवणे यांच्या पथकाने केली.
