नंदुरबार | प्रतिनिधी
नंदूरबार शहरातील जुनी सिंधी कॉलनीत मध्यरात्री दरोडेखोरांनी चाकूचा धाक दाखवून वृद्ध दाम्पत्याला मारहाण करत महिलेच्या अंगावरील तसेच कपाटातील ६ लाख ७९ हजार ८०० रुपये किमतीचे २३.५ तोळे सोन्याचे दागिने व रोख रक्कम चोरून नेल्याची घटना धक्कादायक घटना घडली.
याबाबत पोलीस सूत्रांनी दिलेल्या माहितीनुसार, शहरातील नेहरु पुतळ्याजवळ जयहिंद ईलेक्ट्रॉनिक्सचे मालक नरेशकुमार लेखराज नानकाणी हे जुनी सिंधी कॉलनीत झुलेलाल नगरात राहतात. त्यांच्या सोबत वडील लेखराज खिलुमल नानकाणी, आई मिरादेवी, पत्नी पिंकी, मुले गुंजन व कार्तीक सोबत राहतात. आज दि.२० सप्टेंबर रोजी मध्यरात्री २ ते ३ वाजेदरम्यान घरात सर्व जण झोपलेले असतांना त्यांच्या घरातील स्वयंपाक घरातील खिडकीची जाळी तोडून दरोडेखोरांनी घरात प्रवेश केला. त्यांनी मिरादेवी यांच्या गळ्यावर चाकु ठेऊन धाक दाखवुन अंगावरील सोन्याचे दागीने जबरीने काढले.
त्यावेळी आरडाओरड केली तर जीवे मारण्याची धमकी दिली. घरातील गोदरेज कपाटात ठेवलेले सोन्याचे दागीने जबरीने काढत असतांना कपाट उघडण्याचा आवाज आल्याने लेखराज नानकानी यांना जाग आली. त्यांनी प्रतिकार करण्याचा प्रयत्न केला असता त्यांना कशाने तरी डोक्यावर मारुन दुखापती केले. ओरडले तर गळा कापण्याची धमकी दिली. यावेळी दरोडेखोरांनी 1 लाख 26 हजाराचे 4.5 तोळ्याच्या सोन्याच्या पाटल्या (कंगण) (आई मिरादेवी लेखराज नानकाणी याच्या हातातील), 42 हजाराचे 1.5 तोळ्याची सोन्याची चैन आई मिरादेवी लेखराज नानकाणी हिच्या गळ्यातील), 8 हजार 400 रु. किं.ची 3 ग्रॅमची सोन्याची अंगठी ( आई मिरादेवी लेखराज नानकाणी हिच्या हाताच्या बोटातील), 1 लाख 54 हजार रु. किं.च्या 5.5 तोळ्याच्या सोन्याच्या पाटल्या कपाटात ठेवलेल्या.
28 हजार रु. किं. ची 1 तोळ्याची सोन्याची कानातली फुलीची जोडी, 84 हजाराची 3 तोळ्याचे सोन्याचे मंगळसुत्र , 42 हजारचे 15 तोळ्याच्या 3 नग सोन्याच्या अंगठ्या, 8 हजार 400 रु. किं.चे 3 ग्रॅम सोन्याचे कॉईन, 1 लाख 40 हजार रु.कि. च्या 5 तोळ्याच्या सोन्याच्या बांगड्या 4 नग, 42 हजार रु. किंची 15 तोळ्याची सोन्याची चैन, 5 हजार रुपये रोख कपाटात ठेवलेले असा
एकुण 6 लाख 79 हजार 800 रुपये किमतीचा मुद्देमाल लंपास केला.
दरम्यान लेखराज नानकानी यांच्या सांगण्याप्रमाणे तिघा अनोळखी चोरांपैकी एकाने त्याचे तोंड काळ्या रंगाच्या कपड्याने बाधलेले व गडद मरुम रंगाचा हाफ बाहीचा शर्ट व काळ्या रंगाची फुल पॅन्ट घातलेली तसेच ईतर दोघांनी काळ्या रंगाचे हाफ बाहीचे शर्ट व काळ्या रंगाची फुल पॅन्ट घातलेली होती. तिघे अंदाजे ३० ते ३५ वर्ष वयोगटाचे तसेच मध्यम सडपातळ शरिरियष्टीचे होते. याबाबत नरेशकुमार नानकानी यांच्या फिर्यादीनुसार उपनगर पोलीस ठाण्यात तिघांविरुध्द भादवी 394,506, 323,34 प्रमाणे गुन्हा दाखल करण्यात आला आहे.
या प्रकरणी पुढील तपास उपनगरचे पोनी अजय वसावे करीत आहेत.
घटनास्थळी पोलीस अधीक्षक पी.आर. पाटील, अप्पर पोलीस अधीक्षक निलेश तांबे, उप अधीक्षक संजय महाजन, एलसीबी चे किरण खेडकर, माजी आमदार शिरीष चौधरी आदींनी भेट दिली.
