नंदुरबार l प्रतिनिधी
तळोदा शहरातील बादशाह भरवाड हे म्हशी चारण्यासाठी गेले असता दलेलपूर शिवारातील केळीच्या शेतात अचानक बिबट्या आणि त्याचे 2 बछडे त्यांच्यावर चालून आले.दरम्यान त्यांच्या मदतीला म्हैस मदतीला धावून आल्याने त्यांचा जीव वाचला.
याबाबत सविस्तर वृत्त असे, तळोदा शहरातील बादशाह अर्जुन भरवाड (वय 75) हे म्हशी चारण्यासाठी गेले असता दलेलपूर शिवारातील डिगंबर सूर्यवंशी यांच्या केळीच्या शेतात अचानक बिबट्या आणि त्याचे 2 बछडे त्यांच्यावर चालून आले. बादशाह भरवाड यांच्यावर बिबट्याने हल्ला केला तेव्हा त्यांनी झटापट करायचा प्रयत्न केला. त्यावेळी बिबट्याने त्यांच्या उजव्या हाताला जबर चावे घेऊन जखमी केले.
दरम्यान झटापट करताना ते खाली कोसळले. जखमी वृद्धाने दिलेल्या माहितीनुसार ते खाली पडताच बिबट्या पुन्हा धावून आला त्यावेळी अचानक त्यांची म्हैस मदतीला धावून आली. बिबट्या त्यांच्यावर पुन्हा हल्ला करणार तेवढ्यात म्हशीने बिबट्याला चक्क आपल्या शिंगावर उचलून फेकत झुंज दिली. अन्य दोन म्हशी सुद्धा उचलून फेकत झुंज दिली. अन्य दोन म्हशी सुद्धा धावून आल्या आणि तिन्ही म्हशींनी पाहता पाहता झूंज करून बिबट्या व बछडे यांना पळवून लावले आणि वृद्धाचे प्राण वाचवले.
