नंदूरबार l प्रतिनिधी
नाशिक परिक्षेत्राचे विशेष पोलीस महानिरीक्षक डॉ.बी.जी.शेखर पाटील हे 18 ऑगस्ट रोजी नंदुरबार जिल्हा भेटीसाठी येणार आहेत. सदर भेटी दरम्यान ते शहादा येथे भेट देवून पोलीस दलामार्फत राबविण्यात येणाऱ्या विविध समाजोपयोगी कार्यक्रमांचे उद्घाटन करणार आहेत.
नंदुरबार जिल्हा पोलीस दलातर्फे 18 ऑगस्ट रोजी सकाळी 8 वाजता नाशिक परिक्षेत्राचे विशेष पोलीस महानिरीक्षक, डॉ.बी.जी. शेखर पाटील यांचे हस्ते शहादा तालुक्यातील दुधखेडा धरण परिसरात वृक्ष लागवड करुन वृक्षारोपणाचा कार्यक्रम संपन्न होणार आहे. नंदुरबार जिल्हा पोलीस दलातर्फे एक लाख वृक्ष लागवड करण्याचा संकल्प करण्यात आला होता. त्याअनुषंगाने 5 हजार वृक्षलागवड शहादा तालुक्यातील दुधखेडा धरण परिसरात केल्यानंतर नंदुरबार जिल्हा पोलीस दलामार्फत 1 लाख वृक्ष लागवडीचा संकल्प पूर्ण होणार आहे. यापूर्वी नंदुरबार जिल्ह्यातील विविध पोलीस ठाणे अंतर्गत शाळा, महाविद्यालय, पडीक जमीनी, माळरान इत्यादी ठिकाणी लोकसहभागातून 95 हजार वृक्ष लागवड करण्यात आलेली आहे. 95 हजार वृक्ष लागवड करण्यासाठी नंदुरबार जिल्हयातील विविध शाळा, महाविद्यालय, सामाजीक संघटना व स्थानिक नागरीकांनी स्वयंपूर्तीने सहभाग नोंदवीला होता.
त्यानंतर संभाव्य गुन्ह्यांना आळा घालण्यासाठी व घडलेल्या गुन्ह्यातील संशयीत आरोपीतांना शोधून अटक करण्यासाठी नाशिक परिक्षेत्राचे विशेष पोलीस महानिरीक्षक यांचे संकल्पनेतून सुरू करण्यात आलेला एक कॅमेरा पोलीसांसाठी या उपक्रमाचे उद्घाटन शहादा शहरातील जुन्या पोलीस ठाणे जवळ व्यापारी तसेच नागरिकांच्या उपस्थितीत होईल. त्यानंतर शहादा व तळोदा येथील सीसीटीव्ही कॅमेऱ्यामुळे गुन्हा उघडकीस आल्याने सीसीटीव्ही मालकांचा सत्कार करण्यात येणार आहे. या उपक्रमाबाबत नाशिक परिक्षेत्राचे विशेष पोलीस महानिरीक्षक हे उपस्थितांना मार्गदर्शन करणार आहेत.
शहादा तालुका व शहरातीलसर्व शाळा / महाविद्यलयातील विद्यार्थी व विद्यार्थीनींना व नागरिकांनी, दुधखेडा येथील धरण परिसरात वृक्षारोपण या कार्यक्रमासाठी 18 ऑगस्ट रोजी सकाळी 8 वाजता जास्तीत जास्त संख्येने उपस्थित रहावे असे आवाहन पोलीस अधीक्षक पी.आर.पाटील यांनी केले आहे.
