नंदुरबार l प्रतिनिधी
अक्कलकुवा ते तळोदा रस्त्यावर सोमावल गावाजवळ दुचाकींच्या समोरासमोर झालेल्या धडकेत तिघांचा मृत्यू झाला तर एक जण जखमी झाल्याची घटना घडली.याप्रकरणी तळोदा पोलीसात एका विरुद्ध गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, तळोदा तालुक्यातील गव्हाणीपाडा येथील बादल रविंद्र पाडवी हा अक्कलकुवा ते तळोदा रस्त्याने त्याच्या ताब्यातील दुचाकी (क्र.एम.एच.१५ एफएल ४६२४) रस्त्याच्या परिस्थितीकडे दुर्लक्ष करुन भरधाव वेगात चालवून सोमावल गावाजवळ समोरुन येणाऱ्या दुचाकीला (क्र.जी.जे.०५ एसएच २८९५) धडक दिल्याने अपघात घडला. घडलेल्या अपघातात पंकज दिलवर वळवी, राहूल दिलवर वळवी दोघे रा.मोरंबा ता.कुकरमुंडा जि.तापी व बादल रविंद्र पाडवी या तिघांचा मृत्यू झाला तर अतुल पाडवी यांना दुखापत झाली.
तसेच दोन्ही दुचाकींचेही नुकसान झाले. याबाबत योगेश अशोक ठाकरे यांच्या फिर्यादीवरुन तळोदा पोलिस ठाण्यात बादल पाडवी याच्याविरोधात भादंवि कलम ३०४(अ), २७९, ३३७, ३३८, ४२७, मोटार वाहन कायदा कलम १८४ प्रमाणे गुन्हा दाखल करण्यात आला आहे. पुढील तपास सहाय्यक पोलिस निरीक्षक अमितकुमार बागुल करीत आहेत.
