नंदूरबार l प्रतिनिधी
प्रकाशा ता. शहादा येथे कोकणमाता मंदिर जवळ ट्रक व पीकअप यांच्यात समोरासमोर धडक होऊन अपघातात तीन जण जागीच ठार व दोन जण गंभीर जखमी झाल्याची घटना काल सकाळी साडेसहा वाजेच्या सुमारास घडली. जखमींना नंदुरबार येथील जिल्हा रुग्णालयात तातडीने उपचारासाठी दाखल करण्यात आले. अपघाता नंतर घटनास्थळी जिल्हा पोलीस अधीक्षक पी.आर. पाटील यांनी भेट देऊन पाहणी केली.
याबाबत अधिक माहिती अशी की, पीकअप (क्र.एम.पी.०९, एच.एच.५५११) मध्यप्रदेशातून गुजरात राज्यात लग्न समारंभासाठी लागणारे साहित्य तसेच धान्य घेऊन जात असतांना प्रकाशा गावाजवळ दि.७ मे रोजी सकाळी साडेसहा वाजेच्या सुमारास ट्रक (क्र. जी.जे.५ बी.एक्स.४४८३) ने जोरदार धडक दिली.त्यात पीकअप मध्ये चालकासह एकूण पाच जण होते.त्यापैकी तीन जण जागीच ठार झालेत तर अन्य दोन जन गंभीररित्या जखमी झाले आहेत.
अपघात एवढा मोठा भीषण होता की कानठळ्या बसवणारा आवाज झाला होता.त्यात पीकअप पूर्णतः चक्काचूर झाली. प्रकाशा पोलिसांनी तातडीने अपघात स्थळी जखमींना बाहेर काढण्यासाठी मदत केली.जेसीबी यंत्राच्या साह्याने ट्रकमध्ये अडकलेल्या पीकअप बाहेर काढले.अपघात स्थळी रक्ताच्या सडा पडलेला होता.पीकअप मधील सर्व साहित्य रस्त्यावर अस्ताव्यस्त पडले होते.जखमींना मदत करण्यासाठी प्रकाशा पोलीस दूरक्षेत्राचे संदीप खंदारे व रामा वळवी तसेच जिल्हा परिषदचे माजी उपाध्यक्ष रामचंद्र पाटील सुरेश पाटील स्थानिक पत्रकार सह ग्रामस्थांनी मदत केली व रस्त्यावरची वाहतूक सुरळीत सुरू केली.अपघातानंतर ट्रक चालक व क्लीनर दोघेही फरार झालेले आहेत.
अपघातात हेमराज अंजने (वय ३९) रा. सुरत मनोज घाट्या (वय ४२) रा. सुरत,भगवानभाई गोविंद पंचुले (वय ४८) रा. गोंदिया मध्यप्रदेश हे तिन्ही जण जागीच ठार झाले.शहादा ग्रामीण रुग्णालयात डॉ.गोविंद शेल्टे, डॉ. लक्ष्मीकांत साठे, डॉ. सत्यानंद पाटील यांनी शवविच्छेदन करून प्रेते नातेवाईकांच्या ताब्यात दिली.अपघातात पीकअप चालक गोलूभाई रा. हिरापूर,अनिकेत अंतिम रा. हिरापूर ( मध्यप्रदेश) या गंभीर जखमींना नंदुरबार येथील जिल्हा रुग्णालयात उपचारार्थ दाखल केलेले आहेत.
घटनास्थळी जिल्हा पोलीस अधीक्षक पी.आर. पाटील, शहादा उपविभागीय पोलीस अधिकारी श्रीकांत घुमरे, प्रभारी पोलीस निरीक्षक राजन मोरे यांनी भेट दिली.शहादा पोलिसात अपघाताच्या गुन्ह्याची नोंद करण्यात आलेली आहे.पुढील तपास प्रकाशा पोलीस दुरक्षेत्राचे संदीप खंदारे करीत आहेत.
