म्हसावद l प्रतिनिधी
पालघर डहाणू तालुक्यातील धानिवरी,इभाडपाडा येथील आदिवासी कुटूंबाला अमानुषपणे मारहाण करणाऱ्या दोषीं अधिकाऱ्यांवर कडक कारवाई करण्याबाबत असे मागणीचे निवेदन गणेश खर्डे राज्य उपाध्यक्ष बिरसा फायटर्स यांनी मुख्यमंत्री एकनाथ शिंदे व उपमुख्यमंत्री देवेंद्र फडणवीस तथा पोलिस अधीक्षक पालघर यांच्या कडे एका निवेदनाद्वारे केली आहे
निवेदनात म्हटले आहे की आदिवासी कुटूंबाला अमानुषपणे मारहाण करणाऱ्या जुलुमशाही सरकारांचा तीव्र शब्दात जाहीर निषेध करत असून मुंबई-बडोदा एक्सप्रेसवेच्या भूसंपादनासाठी पालघर पोलिसांनी भयंकर अमानुषपणे मारहाण केली आहे.डहाणू तालुक्यातील धानिवरी,इभाडपाडा गावात आठ आदिवासी कुटुंबे पिढ्यानंपिढ्या त्या ठिकाणी राहतात.आदिवासींना मोबदला न देता,पुनर्वसन न करता मुंबई-बडोदा एक्सप्रेसवेसाठी घरात घुसून अमानुषपणे मारहाण करून महिला,वृद्ध व लहान मुलांना घराबाहेर काढले.पोलिसांनी गरीबांच्या संसार रणरणत्या उन्हात रस्त्यावर फेकला.पुरोगामी महाराष्ट्रात एक्सप्रेससाठी आदिवासींना स्वतःचा घरातून अमानुषपणे मारहाण करून बाहेर काढले जाते;हे किती दुर्दैव आहे.रस्त्यांना न्याय मिळतो.परंतु,या देशातील मूळ मालक आदिवासींना न्याय मिळत नाही ही फार मोठी शोकांतिका आहे.
अमानुषपणे मारहाण करणाऱ्या दोषीं पोलीस अधिकाऱ्यांवर कडक कारवाई करावी व डहाणू तालुक्यातील बाधित कुटूंबाला जोपर्यंत पूर्ण मोबदला,पुनर्वसन होत नाही;तोपर्यत सदर कुटूंबांला आहे त्या ठिकाणी राहण्यास द्यावे हि विनंती.अन्यथा,बिरसा फायटर्स व सर्व आदिवासी संघटना तीव्र आंदोलन करेल याची नोंद घ्यावी.
