तळोदा l प्रतिनिधी
तळोदा येथील वन विभागाने बहुरुपा शिवारात ज्या ठिकाणी बिबट्याची जोडी व सिंह दिसून आला होता.तेथे ट्रॅप कॅमेरे बसविले आहेत.आता हे जंगली श्वापदे कॅमेऱ्यात कैद होतात की गुंगारा देतात याची उत्सुकता तळोदा शहरवासीयांना लागली आहे.
याबाबत अधिक माहिती अशी की, गुरुवारी सकाळी तळोदा येथील बहुरूपा शिवारातील शेतकरी शशीकांत शेंडे व उमाकांत शेंडे या शेतकरी बंधूंना आपल्या शेतापासून शंभर फुटावर सिंह सदृश प्राणी दिसून आला होता.शिवाय तेथे जवळच बिबट्याची जोडी देखील दिसून आली होती.येथील वन विभागाचा अधिकाऱ्यांनी सिंह तळोदा तालुक्यात काय तर महाराष्ट्र राज्यातही नसल्याचे सांगितले आहे.तरीही शेतकऱ्यांनी दावा केल्यामुळे वन विभागाने गुरुवारी सायंकाळी ज्या ठिकाणी म्हणजे शेतात हे प्राणी दिसून आले आहेत.येथे दोन ट्रॅप कॅमेरे कर्मचाऱ्यांनी बसविले आहेत.एक कॅमेरा ज्या लिंबाचा झाडास प्राण्याने ओरबडले आहे.तेथे बसविला असून दुसरा पलीकडे बसविण्यात आल्याचे सांगण्यात आले आहे.सात,आठ महिन्यांपूर्वी देखील चीनोदा शिवाराजवळ एका शेतात राजकीय पदाधिकारी व मजूरांना बिबट्याचा थरार अनुभवला होता.तेव्हा वनविभागाने तेथेही ट्रप कॅमेरे बसविले होते.मात्र हे जंगली प्राणी कॅमेरेत कैद झाले नव्हते.आता पुन्हा कालचा घटनेवरून शेतात कॅमेरे बसविण्यात आले आहेत.साहजिकच नागरिकांचे लक्ष ही या कॅमेराकडे लागले आहे.हे प्राणी त्यात कैद होतात की वन विभागाला गुंगारा देतात या बाबत उत्सुकता ताणली गेली आहे.
वन विभागाने पिंजरेच लावावे.
सदर प्राण्यांचा शोधासाठी वन विभागाने ट्रॅप कॅमेरे लावले असले तरी या प्राण्यांचा ठोस बंदोबस्तासाठी पिंजरेच लावावे.अशी मागणी जोर धरू लागली आहे.वास्तविक तळोदा शहराचा आजुबाजूस बिबट्याचा वावर असल्याचा तक्रारीचा वन विभागाचे अधिकारी देखील मान्य करीत असतात.तरीही पिंजरे लावले जात नाही.या विषयी जनतेने तीव्र नाराजी व्यक्त केली आहे. पिंजरा बाबत अधिकाऱ्यांना विचारले असता असे ठोस कारण शिवाय लावता येत नाही.असे सांगितले जाते.आधीच या हिंस्र प्राणीचा शेत शिवारातील वावरामुळे शेतकरी,शेतमजूर यांचा मध्ये अक्षरशः दहशत पसरली आहे.कुणीच शेतात जायला तयार नाही.त्यामुळे कामेच ठप्प झाली आहेत.अशी वस्तुस्थिती असताना त्यांचा बंदोबस्ताबाबत काहीच उपाय योजना हाती घेतल्या जात नाही.एवढेच नव्हे तर वन विभागाचे वरिष्ठ अधिकारी देखील याविषयी उदासीन भूमिका घेत असल्यामुळे नागरिकांनी तीव्र संताप व्यक्त केला आहे.
