नंदुरबार l प्रतिनिधी
तळोदा तालुक्यातील बोरद येथे पपईची झाडे तोडून शेतकऱ्यांचे नुकसान करणाऱ्या दोघांना पोलिसांनी बेड्या ठोकल्या असून एक जण फरार आहे.
याबाबत अधिक माहिती अशी की, तळोदा पोलीस स्टेशन हद्दीतील बोरद येथील दत्तू रोहिदास पाटील यांचे बोरद शिवारात गट क्र .२१४ मध्ये असलेल्या शेतातील पपईची ६२९ झाडे दि .२३ ते दि .२४ ऑगस्ट दरम्यान कोणीतरी अज्ञात इसमांनी खोडसाळपणे तोडून सुमारे १ लाखाचे नुकसान केल्याने त्यांनी दिलेल्या फिर्यादीवरुन तळोदा पोलीस ठाण्यात गुन्हा दाखल करण्यात आला होता . सदर गुन्ह्यासंदर्भात गोपनीय माहिती मिळाल्यावरुन राजू दादा ठाकरे रा.छोटा धनपूर , ता.तळोदा , रामलाल रतनसिंग मोरे रा.कळमसरा , ता.तळोदा यांना तळोदा पोलीसांनी ताब्यात घेऊन त्यांच्याकडे सखोल चौकशी केली असता त्यांनी सदरचा गुन्हा बालम वाऱ्या वळवी रा.छोटा धनपूर , ता.तळोदा याच्यासोबत केला असल्याची कबुली दिली आहे . यातील संशयित राजू ठाकरे याने यापूर्वी फिर्यादीच्या शेतातील झेंडूची फुले तोडली होती . तेव्हा शेतमालकाने त्याला मारले होते . त्यामुळे त्याने रामलाल व बालम यांच्या मदतीने पपईच्या झाडांचे नुकसान केल्याचे सांगितले आहे . यातील दोन्ही संशयितांना अटक करण्याची कारवाई सुरु असून तिसऱ्या आरोपीचा शोध सुरु आहे . सदरची कारवाई पोलीस अधीक्षक , नंदुरबार महेंद्र पंडीत , अपर पोलीस अधीक्षक , नंदुरबार विजय पवार , उपविभागीय पोलीस अधिकारी , अक्कलकुवा विभाग संभाजी सावंत यांच्या मार्गदर्शनाखाली तळोदा पोलीस ठाण्याचे पोलीस निरीक्षक केलसिंग पावरा , सपोनि.अविनाश केदार , पोहेकॉ महेंद्र जाधव , पोना निलेश खोंडे , पोकॉ राजू जगताप , पोकॉ अजय कोळी , पोकॉ कांतीलाल वळवी यांच्या पथकाने केली आहे . पुढील तपास सपोनि.अविनाश केदार हे करीत आहेत .
