नंदुरबार । प्रतिनिधी
शहादा तालुक्यातील सुलवाडे शेत शिवारात असलेल्या दोन शेतातील रोहित्रावरुन चोरट्यांनी सुमारे 40 हजार रुपये किंमतीची ॲल्युमिनिअमची तार चोरुन नेली.
शहादा तालुक्यातील सुलवाडे येथील देवसिंग पवार व प्रशांत पाटील यांचे सुलवाडे शिवारात शेत आहे. देविसिंग कायसिंग पवार यांच्या शेतातील रोहित्रावरुन 19 हजार 600 रुपये किंमतीची ॲल्यूमिनिअमची तार चोरीस गेली. तसेच प्रशांत रमेश पाटील यांच्या शेतातील रोहित्रावरुन 19 हजार 200 रुपये किंमतीची ॲल्यूमिनिअमची तार चोरीस गेली.
एकूण 38 हजार 800 रुपये किंमतीची ॲल्यूमिनिअमची तार चोरुन नेली. याबाबत महाराष्ट्र राज्य विद्युत वितरण कंपनी शहाद्याचे सहाय्यक अभियंता शशिकांत मनिलाल पटेल यांच्या फिर्यादीवरुन म्हसावद पोलिस ठाण्यात अज्ञात चोरट्यांविरोधात भादंवि कलम 379 प्रमाणे गुन्हा दाखल करण्यात आला आहे. पुढील तपास पोहेकॉ.जितेंद्र पाडवी करीत आहेत.
